नयाँ वाइडबडी मकालु ग्राउन्डेड

काठमाडौं : नेपाल वायुसेवा निगमले अन्तर्राष्ट्रिय उडानमा प्रयोग गरिरहेको एयरबसको ए३३०–२०० सिरिजको ९एन एएलजेड कलसाइनको मकालु नामक वाइडबडी जहाज ग्राउन्डेड भएको छ । निगमले पछिल्लो पटक गत साउन १० गते नेपाल भित्रिएर भदौ ८ गतेबाट व्यावसायिक उडान सुरु गरेको २७४ सिट क्षमताको यो जहाज बिहीबार बिहान दिल्ली उडान गरेर फर्किएपछि ग्राउन्डेड भएको हो ।

‘दिल्ली विमानस्थलमा कार्गो लोड गर्दा कन्टेनरले ठक्कर दिँदा कार्गो ढोका कुच्चिएका कारण यो जहाज उडाउन नमिल्ने भएको हो’, वायुसेवा निगमका सहप्रवक्ता सैलेश कंसाकारले भने । उनका अनुसार काठमाडौं आएपछि कुच्चिएको देखिएकाले आवश्यक मर्मत गर्नुपर्ने भएको भन्दै ग्राउन्डेड भएको हो । यो जहाज एक दुईदिनमै मर्मत गरेर उडान गर्न सकिने जानकारी कंसाकारले दिए ।

यो जहाज बिहीबार बिहान ८ बजे दिल्लीका लागि उडेको थियो । दिल्लीबाट फर्केर साढे १२ बजेतिर काठमाडौं फर्किएको यो जहाजको सामान निकाल्ने ढोकाछेउ कुच्चिएका कारण सो स्थानमा प्वाल पर्न गई जोखिम हुने भन्दै ग्राउन्डेड गरिएको हो । जहाज ग्राउन्डेड भएपछि यसको आवश्यक मर्मत जहाज निर्माता कम्पनी एयरबससँग सोधेरै गर्नुपर्ने निगम स्रोतको भनाइ छ ।

दुईमध्ये एक न्यारोबडी ग्राउन्डेड भएकाले शुक्रबार बिहान गर्नुपर्ने दिल्ली उडान बोइङबाट भएको हो । बोइङको शुक्रबार बेलुकाको उडान ग्राउन्डेड बाइडबडी मर्मत भएपछि गर्ने भनि तालिकामा राखिएको थियो । तर, एयरबसकै अनुमतिबाट मात्र बनाउनुपर्ने भएपछि यसबाट हुने उडान रद्द भएको निगमले जानकारी दिएको छ । मकालु थन्किएपछि शुक्रबार बेलुकाको दिल्ली उडान बैंककबाट फर्किएको अर्को वाइडबडीले गरेको उल्लेख छ ।

अझै उडेन न्यारोबडी

निगमको नयाँ बाइडबडीसँगै अर्को एक ए३२०–२०० सिरिजको ९नएन एकेडब्लू नामक १५८ सिट क्षमताको न्यारोबडी जहाज भदौ २१ गते बिहीबार चरासँग ठोक्किएर ग्राउन्डेड भएको छ । यो जहाज मलेसियाबाट काठमाडौं आउँदै गर्दा अवतरणका क्रममा चरासँग ठेक्किएको थियो । उक्त जहाज मर्मतमै रहेको र अर्को एक ठूलो जहाज पनि ग्राउन्डेड हुँदा निगमलाई उडान तालिका मिलाउन हम्मे हम्मे छ । चरा ठोक्किएको उक्त जहाजको मर्मत शनिबारसम्म सकिने र नियमित उडानमा प्रयोग हुने जानकारी कंसाकारले दिए ।

कंसाकारका अनुसार सातामा पाँचवटा जहाजको ४० उडान तालिका छ । दुई वटा जहाज ग्राउन्डेड हुँदा निगमले एउटाको उडान तालिका अर्कोमा सारेर मिलाइरहेको छ । केही घण्टा ढिलो गरेर भए पनि उडान नियमित भइरहेको निगमका सहप्रवक्ता कंसाकार बताउँछन् ।

निगमको सातामा दिल्ली १०, दुबई र दोहा ७÷७, मलेसिया ४, हङकङ, मुम्बई, बैंङ्लोर र बैंकक ३÷३ वटा उडान तालिका छ । दुईवटा जहाज ग्राउन्डेड हुँदा निगमले उडान व्यवस्थापन गर्न गाह्रो भए पनि कुनै पनि उडान संख्या नघटाएको जानकारी निगमले दिएको छ । शनिबारबाट चरा ठोक्किएको न्यारोबडी नियमित उडानमा आउने भएकाले समस्या नहुने र उडान नर्मल हुने बुझाइ पनि कंसाकारको छ ।

दुबई रोकेर मलेसिया गएकोमा छानबिन

यसैबीच निगमले गत भदौ २४ गते आइतबार राति दुबई जानुपर्ने जहाजको उडान रद्द गरेर भोलिपल्ट सोमबार मलेसिया गएको विषय छानबिनमा परेको छ । सोमबार बिहान ९ बजे मलेसिया जान आइतबारदेखि नै दुबई उडान रोकेर राखेको विषयमा आवश्यक छानबिन भइरहेको र पर्यटन सचिवलाई पनि यसबारे बुझ्न निर्देशन दिएको पर्यटनमन्त्री रवीन्द्र अधिकारीले बताए । उनले यो उडानमा के भएको हो त्यसको सत्यतथ्य सार्वजनिक गर्ने बचन दिए पनि निगमले मलेसिया उडान नियमित भएको र दुबई उडान जहाज थन्किएकाले नभ्याएको भन्दै रद्द गरेको विज्ञप्ती सार्वजनिक गरेको छ ।

तर निगमका सहप्रवक्ता कंसाकारले भने यो जहाज दुबई र मलेसिया नियमित उडान तालिका भएको बताए । उनका अनुसार यही चरा ठोक्किएर ग्राउन्डेड भएको जहाजको उडान तालिका मिलाउनुपर्ने भएका कारण आइतबारको दुबई उडान रद्द गरिएको थियो । निगमले सोमबारको पाटा नेपालले मलेसियामा आयोजना गरेको कार्यक्रममा सहभागी हुन निगमका पदाधिकारीसहित सोमबार बिहान ९ बजेको उडान रहेकाले दुबई गएर आउँदा ढिलो हुने भएपछि उडान रोकेको उल्लेख छ । निगमकै चार कर्मचारी, पर्यटन बोर्डका पदाधिकारी, पर्यटन व्यवसायी र केही पत्रकारसहित ३७ जनाको टोली क्वालालम्पुर जान निगमले नियतबस उडान रोकेर राखेको थियो ।

वाइडबडीको अनियमिततामाथि टालटुले छानबिन

यस्तै निगमको वाइडबडी जहाज खरिदमा भएको अनियमितताका विषयमा पर्यटन मन्त्रालयले टालटुले तरिकाले छानबिन गरिरहेको छ । यो विषयलाई गम्भीर रूपमा लिएको र सोहीअनुसार छानबिन समिति गठन गरेको पर्यटनमन्त्री अधिकारीले तर्क गरे । उनले भने, ‘यो जहाज किन्न म मन्त्री भएर आउनुभन्दा अगाडि नै पैसा पठाइसकिएको थियो । जहाज रिसिभ मात्रै आफूले गरेको हो । तर पनि जहाज खरिदमा गरिएको शंकाको विषयमा छानबिन गरेर स्पष्ट पार्न आफू प्रतिबद्ध रहेको मन्त्री अधिकारीको भनाइ छ ।

यो जहाज खरिद छानबिन समितिका संयोजक तथा पर्यटन मन्त्रालयका सहसचिव बुद्धिसागर लामिछानेका अनुसार १५ कार्यदिन पुग्न अझै ४÷५ दिन बाँकी रहेकाले तोकिएकै समयमा प्रतिवेदन सार्वजनिक गर्ने बताए । लामिछानेले भने, ‘जुन उद्देश्यका लागि काम सुरु गरिएको हो त्यो पूरा गरेर यथार्थ विवरण दिनेछौं ।’ जहाज खरिद पारदर्शी रूपमै भएको भए पनि सुरुदेखि के भएको थियो र कसरी आइपुग्यो भन्नेसम्मको विवरण दिने लामिछानेले बताए । उनका अनुसार काम अझै बाँकी रहेकाले केही दिनपछि प्रतिवेदन तयार हुने र मिडियामार्फत नै सार्वजनिक गर्ने पनि बताए । मन्त्रालयले भने लामिछाने आफैं निगम सञ्चालक समितिको बोर्डमा बसेर गरेको निर्णयमा सोही व्यक्तिलाई राखेर टालटुले छानबिन गरिरहेको छ । यो छानबिन समितिले दिने प्रतिवेदन ढाकछोप गर्न मात्रै हुने उल्लेख छ ।