टीकापुर : कैलालीको जोशीपुरका एक व्यापारीको हत्यामा समेत प्रहरीले सक्रियता नदेखाएको भन्दै स्थानीयले आक्रोश व्यक्त गरेका छन् । निर्मला पन्त हत्या प्रकरणमा प्रहरीले गरेको ढिलासुस्तीको सर्बत्र आलोचना भइरहेका बेला अर्को अपराध भएको हो ।
कैलालीको जोशीपुर गाउँपालिका वडा नं. १ जोशीपुर बजारका ३७ वर्षीय व्यापारी रामप्रसाद जैशी (ओझा) को विहीबार राती घरमा कोही नभएको बेला हत्या गरिएको थियो । प्रहरी, समयमै घटनास्थल नपुगेको भन्दै स्थानीयले आक्रोश व्यक्त गरेका हुन् । स्थानीयले प्रहरीलाई अनुसन्धानका लागि दबाव दिन भन्दै जोशीपुरस्थित प्रहरी चौकीमा धर्ना दिए भने बजार बन्द गरेका छन ।
जोशीपुर बजारमा किरानाको पसल राखेका ओझाको विहीवार राति घरमै हत्या भएको हो । विहान ९ बजेपछि मात्रै छिमेकीले हत्याबारे थाहा पाएपछि प्रहरीलाई खबर गरेका थिए । घटनास्थलमा इलाका प्रहरी कार्यालय भजनीको टोली पुगेको भए पनि घटनास्थल घेराऊ गर्ने बाहेक अन्य केही नगरेको भन्दै स्थानीयले आक्रोश व्यक्त गरेका हुन् ।
ओझाका आफन्त गणेशराज ओझाले विहान ९ बजे नै जिल्ला प्रहरी कार्यालयमा जानकारी दिएको भएपनि अनुसन्धानका लागि साँझ ५ बजेसम्म पनि प्रहरी परिचालित नभएको आरोप लगाए । ‘विहान ९ बजे नै जिल्ला प्रहरी कार्यालयमा हामीले खबर गरेका थियौं’ ओझाले भने । ‘साँझ ५ बज्दा समेत अनुसन्धानका लागि प्रहरीले टोली पठाएन् ।’
पीडितका आफन्तहरुले प्रहरीले अनुसन्धान शुरु नगर्दासम्म लाशको पोष्टमार्टम् समेत हुन नदिने भन्दै अडान लिएका छन् । ‘प्रहरीले घटनास्थलबाट अनुसन्धान शुरु गर्नुपर्छ’ । मृतक ओझाका आफन्त पदमराज ओझाले भने । ‘त्यसपछि मात्रै पोष्टमार्टम् गर्न दिन्छौं ।’ प्रहरीले अनुसन्धानमा आलटाल गर्न खोजेको उनले आरोप लगाए ।
इलाका प्रहरी कार्यालय भजनीका प्रमुख प्रहरी निरीक्षक राजेन्द्रबहादुर चन्दले घटनास्थल र प्रमाणहरु नियन्त्रणमा लिएको बताउँदै जिल्लाबाट आउने टोली आइ नपुगेको बताए ।
जोशीपुरका किराना व्यापारी ओझा विहीवार राति घरमा एक्लै बसेका थिए । ओझाकी श्रीमती दुई छोरासहित तीज मनाउन टीकापुरमा रहेको माइतीमा गएका बेला ओझाको राती हत्या गरिएको हो ।
स्थानीयका अनुसार ओझाको कोठामा दुई बोतल वियर, एक गिलास र एक प्याकेट नमकिन राखिएको भेटिएको छ । पसलको गल्लामा खुटपाट गरिएको छ भने पसलबाट टेलिफोन सेट र केही थान खाता समेत गायब छन ।
ओझा जोशीपुर क्षेत्रमा किराना सामानको थोक तथा खुद्रा बिक्रेता हुन । भारतीय रुपैयाँ सटहीको काम समेत गर्दै आएका ओझाको हत्या लेनदेनकै विषयमा भएको हुनसक्ने स्थानीयले आशंका गरेका छन् ।
बजारमै रहेको घरमा सुतिरहेको अवस्थामा ओझाको हत्या भएपछि स्थानीयहरु त्रसित बनेका छन् । जोशीपुर बजार व्यवस्थापन समितिका अध्यक्ष विश्वनाथ चौधरीले घरमै एक व्यापारीको हत्या हुनुले आफूहरु त्रसित बनेको बताए ।
सबेरै खुल्ने ओझाको पसल ९ बजेसम्म पनि नखुलेपछि स्थानीयले घरमै गएर हेर्दा उनी मृत अवस्थामा फेला परेका थिए । प्रहरीले मृतक ओझाको घाँटीमा निलडाम रहेको जनाएको छ । विहीवार साँझ पसल बन्द गरेर सुतेका ओझाको हत्या भएको विरोधमा शुक्रबार ब्यापारीहरुले बजार बन्द गरेका छन ।
‘एकजना ब्यापारीको घरमै सुतेको अवस्थामा हत्या हुनुले शान्ति सुरक्षाको अवस्था आफै झल्किन्छ’ जोशीपुर बजार व्यवस्थापन समितिका सचिव केशवराज जोशीले भने । जोशीपुरका ब्यापारीहरुले हत्याराको खोजीको मागगर्दै शनिबार पनि बजार बन्दको घोषणा गरेका छन ।
प्रतिक्रिया दिनुहोस !
