बेलबारी : बिर्तामोड युनाइटेड दोस्रो डाँगीहाट अन्तर्राष्ट्रिय आमन्त्रण गोल्डकप फुटबल प्रतियोगिताको फाइनलमा पुगेको छ । शुक्रबार भएको सेमिफाइनलमा रेड हर्स क्लब इलामलाई ३–२ गोलले पराजित गर्दै बिर्तामोडले फाइनलमा मोरङ फुटबल एकेडेमीसँगको भेट पक्का गरेको हो । साविक विजेता बिर्तामोडको जितमा रोशन थम्स्वाङ, गणेश हेमरन र सञ्जय धिमालले गोल गरे । दर्शन गुरुङ र अनिल तिमल्सिनाले एकएक गोल फर्काए पनि इलामलाई जितका लागि पर्याप्त हुन सकेन ।
खेलको १४औं मिनेटमै बिर्तामोडका रोशन थम्स्वाङले गोलको खाता खोलेका थिए । इलामका गोलरक्षक दिपान्छु राउतले क्लियर गर्न नसकेको बललाई खेलको म्यान अफ दी म्याच रोशनले दर्शनीय गोल गरे । त्यसको १२ मिनेटपछि नै गणेश हेमरनले गोल गर्दै बिर्तामोडले अग्रता दोब्बर बनाए । इन्जुरी समयमा सञ्जय धिमालले गोल गर्दै बिर्तामोडको जित सुनिश्चित गरेका थिए ।
इलामका तर्फबाट भने दुवै गोल मध्यान्तरपछि मात्रै सम्भव भएको थियो । दर्शन गुुरुङले उत्कृष्ट गोल फर्काएर इलामलाई सान्त्वना दिलाउने प्रयास गरे । खेलको अन्तिम समयमा अनिल तिमल्सिनाले गोल अन्तर घटाए पनि टोलीलाई जित भने दिलाउन सकेनन् ।
प्रतिक्रिया दिनुहोस !
