मलंगवा : नगरपालिकाले तोकेबाहेकको थप कर दिन नमानेपछि लालबन्दी बजारका चार वटा ठेलामा बजारका ठेकेदारले ताला लगाएका छन् । नगरले प्रतिठेला दैनिक १२ रुपैयाँको दरले कर तोके पनि ठेकेदारले ४० रुपैयाँको दरले कर असुली गरेपछि स्थानीय व्यापारीले विरोध जनाएका हुन् । १२ रुपैयाँबाहेक नदिने अडान व्यापारीले लिएपछि शुक्रबार साँझ ठेकेदारले चार वटा ठेलाको फलफूल फालिदिएका छन् । ठेकेदारले चार वटा ठेलामा फलामको सिक्री लगाई ताला लगाएका छन् । ठेलामा ताला लगाएपछि व्यापारीहरूले न्याय खोज्दै नगरपालिकासमक्ष गुहार मागेका छन् ।
नगरपालिकाले निकालेको सूचनामा प्रतिठेला दैनिक १२ रुपैयाँ कर उल्लेख गरिएको लालबन्दीका फलफूल व्यापारी अशोक साहले बताए । आफूहरूले १२ रुपैयाँको दरले दिन तयार हुँदा ४० रुपैयाँका दरले लिन थालेपति विरोध गर्नुपरेको साहले बताए । ४० रुपैयाँको दरले दिन नमानेपछि ठेकेदारले शुक्रबार साँझ गाली गलौज गर्दै फलफूल फाली ठेला कब्जा गरेको साहले दुःख पोखे ।
सानो व्यापारमा पनि चर्को कर लगाएपछि आफूहरूको उठीबास हुने भन्दै नगरपालिकामा भदौ ६ गते निवेदन दर्ता गराएको रामबाबु महतोले बताए । ‘निवेदन दिएको २५ दिन भइसक्दा पनि सुनवाइ भएको छैन । नगरपालिकाले सुनवाइ नगरेपछि आफूहरूले तीन दिनदेखि कर दिएका थिएनौं । ठेकेदारले पाँच दिनको कर नदिएको भन्दै असुली गर्न आए ।’ महतोको गुनासो गरे ।
‘२० वर्षदेखि यही ठाउँमा व्यापार गर्दै आएको छु’, व्यापारी विनोद कापडले भने, ‘तर आजसम्म यसरी मनपरी कर तिर्नुपरेको थिएन, एक रुपैयाँदेखि कर तिर्दै आएका छौं । गत वर्ष १० रुपैयाँ थियो । तर यसै वर्षदेखि एकैचोटि ४० रुपैयाँ लिन थालियो । दैनिक तीनचार सयको बिक्री हुने पसलले कसरी ४० रुपैयाँको कर तिर्नू ? झन् कहिलेकाहीँ त बिक्री पनि हुँदैन ।
नगरपालिकाले नै ४० रुपैयाँ लिन भनेपछि आफूहरूले सोहीअनुसार कर उठाएको व्यापारी ज्ञानु योञ्जनले बताए । ‘व्यापारीहरूले ४० रुपैयाँ बढी भएको भनेपछि हामीले झन् पाँच रुपैयाँ कम गरी ३५ रुपैयाँ उठाएका छौं । अरू व्यापारीले सहजै कर तिर्दै आएका छन् । यी चार जनालाई मात्र आपत्ति भएको हो ।’ उनले नगरपालिकाले ठेलाको नभई प्रतिकार्टुन १२ रुपैयाँ लिन अह्राएको बताए ।
एउटा ठेलाले २० कार्टुन बेचे पनि आफुहरूले ३५ रुपैयाँ नै लिने गरेको योञ्जनले दाबी गरे । योञ्जनले आक्रोश हुँदै भने, ‘दिनभरि व्यापार गर्नेले कर तिर्ने बेला भाग्दा आफूहरूलाई समस्या हुन्छ । पाँच दिनसम्म कर नतिरेपछि बाध्य भएर ताला लगाएका हौं । लालबन्दी नगरपालिकाका मेयर मानबहादुर खड्काले ठेकेदारले बढी लिन खोज्ने र फलफूल व्यापारीले कम दिन खोज्ने गरेकाले विवाद निम्तिएको बताए । मेयर खड्काले भने, ‘व्यापारीहरूले ठेकेदारले कर बढी लिएको गुनासो गरेका छन् ।’ उनले पट्टामा तोकिएभन्दा बढी लिएको प्रमाण ल्याए कारबाही गर्ने बताए । ठेकेदारले ४८ लाख रुपैयाँमा बजार ठेक्का लिएको हो ।
प्रतिक्रिया दिनुहोस !
