काठमाडौं : गण्डकी प्रदेश र थ्रीस्टार एकेडेमी राजधानीमा जारी पाँचौं ढोरपाटन पुरुष भलिबल प्रतियोगिताको क्वार्टरफाइनलमा प्रवेश गरेका छन्।गण्डकी समूह ‘डी’को विजेता र थ्रीस्टार एकेडेमी समूह ‘सी’को विजेताका रूपमा अन्तिम आठमा पुगेका हुन्।
गण्डकी समूह चरणको अन्तिम खेलमा पाल्पालाई ३-० को सोझो सेटमा पराजित गर्दै समूह विजेता बन्यो। नयाँ बसपार्कमा मंगलबार भएको खेलमा गण्डकीले पहिलो सेटमा २५-१४ को जित निकाल्यो। दोस्रो सेटमा पनि २५-१५ को सहज जित निकालेको गण्डकीले तेस्रो सेटमा २५-१९ को जित निकाल्दै तीन खेलबाट नौ अंक जोड्यो।
यो समूहबाट एक टोलीको टुंगो लाग्न बाँकी छ। अर्को खेलमा पाल्पाले धादिङलाई २५-८, २५-११, २५-८ ले पराजित गर्यो। यो समूहबाट चितवन टाइगर र पाल्पामध्ये एक टोलीले अन्तिम आठमा स्थान बनाउने छन्।
थ्रीस्टारले समूह चरणको अन्तिम खेलमा सूर्यदीप कलेजलाई २५-१६, २५-१३, २५-१५ ले पराजित गर्दै समूह विजेताका रूपमा अन्तिम आठमा स्थान पक्का गर्यो। बडीगाड गाउँपालिकाले सूर्योदय क्लबलाई ३-१ ले हरायो।
प्रतियोगिताअन्तर्गत बुधबार समूह चरणका अन्तिम खेलहरू हुनेछन्। समूह ‘बी’को अन्तिम खेलमा सूर्योदय क्लबले एपीएफको सामना गर्नेछ। ढोरपाटनले धादिङ, चितवन टाइगरले पाल्पा, सूर्यदीप कलेजले बूढानीलकण्ठ र ग्लासियर कलेजले बडीगार्ड गाउँपालिकासँग खेल्नेछ।
प्रतिक्रिया दिनुहोस !
