पोखरा : गण्डकी प्रदेशसभामा कांग्रेसका सांसद विन्दुकुमार थापालाई धम्क्याएर पैसा मागेको आरोपमा पक्राउ परेका ४ जनालाई कास्की अदालतले ५ वर्षको कैद सजाय सुनाएको छ । अदालतले मुख्य योजनाकार नलबहादुर गुरुङ र अमृत खड्कालाई ५÷५ र शिव कार्की र रामु सुवेदीलाई ४/४ वर्ष जेल सजाय सुनाएको हो । उनीहरु सबैलाई कैद र ५०÷५० हजार रुपैयाँ जरिवानाको फैसला अदालतले गरेको छ ।
न्यायाधीश काजिबहादुर राईको इजलासले मंगलबार उनीहरुलाई कैद र जरिवानाको फैसला गरेको हो । ती ४ जनाविरुद्ध अपहरण तथा शरीर बन्धक उद्योग तथा संगठित अपराधसम्बन्धी मुद्दा थियो । संगठित अपराध मुद्दामा उनीहरुले उन्मुक्ति पाएका छन् । उनीहरुले प्रदेश सांसद थापा, प्रतिष्ठित व्यवसायी कालु गुरुङलाई फोनबाट धम्क्याएर करौडौं रुपैयाँ मागेको सूचनाका आधारमा प्रहरीले पोहोर माघमा पक्राउ गरेको थियो । व्यवसायी पृष्ठभूमिका सांसद थापा र अर्का व्यवसायी कालु गुरुङलाई ती ४ जनाले एक महिनासम्म धम्क्याएका थिए । बुटवलमा कम्युनिस्ट नेताहरुलाई मारेर कुख्याति कमाएका मनोज पुनको नाम लिएर यी ४ जनाले सांसद र गुरुङलाई धम्क्याएका हुन् । सांसद थापासँग २ र व्यवसायी गुरुङसँग १० करोड रुपैयाँ उनीहरुले मागेका थिए ।
विदेशको नम्बरबाट फोनबाट धम्क्याएका उनीहरुलाई प्रहरीले महिना दिन लामो प्रयासपछि पक्रन सकेको थियो । पक्राउ परेपछि उनीहरु विरुद्ध सांसद थापा र व्यवसायी गुरुङले जाहेरी दिएका थिए । मुख्य योजनाकार भनिएका पोखरा १७ बस्ने नलबहादुर गुरुङ शंकर नामले चिनिन्छन् । उनी स्याङ्जाको टक्सारका हुन् । अमृत खड्का पनि मुख्य योजनाकार हुन् ।
‘मनोज दाइ भारतमा हुनुहुन्छ, यता आउन मिल्दैन । तपाईंबाट २ करोड रुपैयाँ अपेक्षा गर्नु भएको छ’ भन्दै उनीहरुले सांसद थापासँग पैसा मागेका थिए । उनीहरुले पैसा नदिएकै कारण बुटवलका बलु पौडेलको हत्या भएको थापालाई फोनबाट सुनाउँथे । धम्की दिएपछि प्रदेश सांसद थापा घरबाहिर निस्कन कम गरेका थिए । त्यस्तो धम्कीको जानकारी प्रहरीलाई गराएका थिए । कुख्यात डन मनोज पुनको नाम जोडे पनि यी ४ जनाको पुनसँग कनेन्सन नभएको प्रहरीको भनाइ थियो ।
प्रतिक्रिया दिनुहोस !
