कुस्मा : पर्वतमा पहिलोपटक सदरमुकाम बाहिरका स्वास्थ्य केन्द्रमा एक्सरे सेवा सञ्चालनमा आएको छ । जिल्लाको कुस्मा नगरपालिका १२ ठूलीपोखरीस्थित ठूलीपोखरी प्राथमिक स्वास्थ्य केन्द्रमा पहिलोपटक एक्सरे सेवा सुरु भएको हो । ग्रामीण क्षेत्रमा पनि उपयुक्त भवन, दक्ष जनशक्ति र विद्युतको पर्याप्तता भएपछि एक्सरे मेसिन उपलब्ध गराइएको हो ।
प्राथमिक स्वास्थ्य केन्द्रलाई स्वास्थ्य तथा जनसंख्या मन्त्रालयले एक्सरे मेसिन उपलब्ध गराएको हो भने कुस्मा नगरपालिका १२ वडा कार्यालय र नगरपालिकाले विनियोजन गरेको ५ लाख रुपैयाँको लागतमा एक्सरे कोठा, सामग्रीसमेतको व्यवस्था गरिएको छ । एक्सरे सुविधा थपिएपछि सामान्य चोटपटक लाग्दा र सामान्य परीक्षणका लागि पनि सदरमुकामको अस्पताल र पोखरा पुग्नुपर्ने अवस्थाको अन्त्य भएको प्राथमिक स्वास्थ्य केन्द्र प्रमुख डा. विवेक भण्डारीले बताए । उनले हाडजोर्नीका ठूला समस्या बाहेक अन्य कामहरु अन्य उपचार यहींबाट दिन सकिने बताए ।
केन्द्रमा एक्स–रे गर्ने कर्मचारीको दरबन्दी नभएपनि तत्काल अन्य अनुभवी जनशक्तिबाट सञ्चालन गर्ने उनले सुनाए । सदरमुकाममा रहेको जिल्ला अस्पतालपछि दोस्रो ठूलो सरकारी स्वास्थ्य केन्द्रको रुपमा रहेको ठूलीपोखरीमा एक्सरे सेवा सञ्चालनमा आएपछि उक्त क्षेत्रका बासिन्दा खुसी भएका छन् । ‘अब हाडको शल्यक्रियाबाहेक सबै किसिमका उपचार गर्न सकिन्छ, अब सामान्य समस्याको उपचारका लागि अन्यत्र जानु पर्दैन’, स्वास्थ्य केन्द्रका डा. भण्डारीले भने ।
उक्त प्राथमिक स्वास्थ्य केन्द्रमा एक्स–रे मेसिन जडान भएसँगै कुश्मा नगरपालिकाका १२ सँगै, ९, १३, १४, मोदी गाउँपालिका ८ राम्जा, फलेबास नगरपालिका १ कार्कीनेटा, २ थापाठाना र ३ शंकरपोखरीका बासिन्दा प्रत्यक्ष रुपमा लाभान्वित हुने भएका छन् ।
उक्त एक्सरे सेवाको कुस्मा नगरपालिकाका प्रमुख रामचन्द्र जोशीले मेसिनको बटन थिचेर उद्घाटन गरेका छन् । उनले कुश्मा नगरपालिकाका सबै स्वास्थ्य संस्थालाई प्रभावकारी उपचार सेवा प्रदान गर्न नगरपालिकाले विशेष कार्ययोजना अघि सार्ने बताए । जिल्ला अस्पतालमा सबैखाले उपचार सेवा र ग्रामीण क्षेत्रमा रहेका स्वास्थ्य चौकीलाई पनि चौबीसै घन्टा आधारभूत स्वास्थ्य सेवा दिने गरी विकास गरिने बताए । उनले लामो समयदेखि जिल्ला अस्पतालमा रोकिएको एम्बुलेन्स सेवा पनि सोमबारदेखि सञ्चालनमा आएको बताए ।
प्रतिक्रिया दिनुहोस !
