काठमाडौं : नेपाली बुद्धिचाल खेलमा अहिलेका धुरन्धर खेलाडी हुन्, मदनकृष्ण कायस्थ । २७ वर्षीय यी भक्तपुरे खेलाडीको बुद्धिचाल खेल्ने क्षमता बेजोडको छ । त्यसैले उनी पछिल्ला वर्ष पाका र अनुभवी खेलाडीलाई लगातार पछि पार्दै नेपाल च्याम्पियन बनिरहेका छन् । मदनकृष्ण अहिले अर्को साता जर्जियामा आयोजना हुने ‘४३औं चेस ओलम्पियाड’को तयारीमा व्यस्त छन् ।
घरभित्रै चर्चित खेलाडीलाई प्रतिद्वन्द्वी बनाएर बुद्धिचालको चाल चलिरहेका उनका लागि बिहीबार ठूलो अवसर जुट्यो । नेपाली बुद्धिचाल खेलाडीका लागि सबैभन्दा ठूलो अन्तर्राष्ट्रिय प्रतियोगिताको मुखमै कायस्थले पूर्वविश्व च्याम्पियन जिएम झु चेनसँग बुद्धिचालको चाल चल्ने कला सिक्ने अवसर पाएका हुन् । नेपाल बुद्धिचाल संघले ओलम्पियाडमा सहभागी र अन्य राष्ट्रिय स्तरका खेलाडीलाई चेनसँग मैत्रीपूर्ण खेल खेल्ने अवसर जुटाइदिएको थियो ।
‘बुद्धिचालमा राम्रा खेलाडीसँग खेल्ने इच्छा सबैको हुन्छ । अझ विश्व च्याम्पियन जस्तो अनुभवी खेलाडीसँग खेल्न पाउनु हाम्रो लागि ठूलो अवसर हो’, मदनकृष्णले भने । सन् २००१ को विश्व बुद्धिचाल च्याम्पिन झु बुधबार मात्र दुईदिने भ्रमणका लागि नेपाल आएकी थिइन् । संघले नेपाली खेलाडीको स्तर विकास गर्न झुसँग काठमाडौंमा मैत्रीपूर्ण खेल खेल्ने मौका जुराइदिएको हो ।
झु चेस ओलम्पियाडकै क्रममा जर्जियामा आयोजना हुने विश्व बुद्धिचाल महासंघको चुनावी अभियानका लागि नेपालका प्रतिनिधिसँग छलफल गर्न काठमाडौं आएकी हुन् । झुले महासंघको कोषाध्यक्ष पदमा चुनाव लड्ने तयारी गरिरहेको बताइएको छ । झुसँग मैत्री खेल खेल्न झापा दमककी खुश्वु थापा पनि बुधबार नै काठमाडौं आएकी थिइन् । ओलम्पियाडमा सहभागिता जनाउन लागेकी १४ वर्षीया खुश्बुले झुसँगको खेलले आत्मविश्वास बढाएको बताइन् ।
ओलम्पियाडमा नेपालबाट सहभागिता जनाउन लागेकी खुश्वु सबैभन्दा कान्छी खेलाडी हुन् । मदनकृष्ण र खुश्बुसँगै अन्य ३० जना खेलाडीले पनि पूर्वविश्व च्याम्पियन झुुसँग मैत्रीपूर्ण खेल खेले । लाइनै राखिएका ३० वटा बोर्डमा ३० जना खेलाडीसँग झुले एकैसाथ क्रमैसँग चाल चलेकी थिइन् ।
‘नेपालका चर्चित खेलाडीसँग खेल्न पाउँदा निकै खुसी भएँ । यहाँका खेलाडी धेरै क्षमतावान् पाएँ । नेपालको आतिथ्यले पनि मेरो मन छोएको छ । बुद्धिचाल सबै उमेरका खेलाडीले खेल्नसक्ने खेल भएकाले यसको फाइदा धेरै छ’, ४२ वर्षीया झुले भनिन् ।
संघले पनि झु नेपाल आएको मौकालाई भरपूर सदुपयोग गरेको हो । ‘शीर्ष खेलाडीलाई विश्व च्याम्पियनसँग खेलाउँदा अनुभव साटिनुका साथै ओलम्पियाड खेल्ने खेलाडीका लागि थप सहयोग भएको छ’, संघका पूर्वअध्यक्ष एवं विश्व बुद्धिचाल महासंघ इथिक्स कमिटीका सदस्य राजेशहरि जोशीले भने । जोशी एसिएन बुद्धिचाल महासंघ जोनल ३.२ का अध्यक्षसमेत हुन् ।
प्रतिक्रिया दिनुहोस !
