विदुर : लगातारको वर्षा र पहिरोका कारण नुवाकोटका सयौं घर उच्च जोखिममा परेका छन् । पहिरोको कारण नुवाकोट जिल्ला नै उच्च जोखिममा छ । वर्षाका कारण नुवाकोटमा विभिन्न स्थानमा गएको पहिरोले यस वर्ष व्यापक धनजन क्षति गरेको जिल्ला प्रशासन कार्यालय नुवाकोटले जनाएको छ ।
हाल चार सय ५० घर पहिरोको उच्च जोखिममा रहेकोे जिल्ला प्रशासन कार्यालयका प्रशासकीय अधिकृत नन्दलाल शर्माले बताए । उनका अनुसार पहिरोले चार हजार २ सय घर परिवार प्रभावित भएका छन् । पहिरोको कारण उद्धार तथा राहतका लागि सवा करोडभन्दा बढी आवश्यक रहेको जिल्ला विपद् पूर्वतयारी तथा प्रतिकार्य योजनामा जनाइएको छ । पहिरोको कारण नुवाकोटको पश्चिमी भेगमा रहेको किस्पाङ गाउँपालिकामा एक सय ३० घर जोखिममा परेको छन् ।
१२ स्थानीय तहमा अविरल वर्षा
पहिरोको समस्या बढ्न थालेकोपछि नियन्त्रणका लागि दीर्घकालीन योजना तयार गरी सबै स्थानीय तहले काम गर्नुपर्ने विदुर नपाका मेयर सञ्जु पण्डितले बताए । जिल्ला प्रशासन कार्यालयका अनुसार साउनयता मात्र नुवाकोटमा पहिरो र बाढीका कारण करोड बढीको क्षति भएको छ । २१ घरमा क्षति पुगेको छ भने दुई सय ६५ घर जोखिममा परेकोले स्थानीयले राहत माग्दै जिल्ला प्रशासन कार्यालयमा निवेदन दिएका छन् ।
जिल्ला दैवीप्रकोप उद्धार तथा विपद् व्यवस्थापन समितिले सार्वजनिक गरेको ‘जिल्ला विपद पूर्वतयारी तथा प्रतिकार्य योजना’मा जिल्लामा पहिरोको जोखिम उच्च रहेको उल्लेख गरिएको छ । दुई नगर र १० गाउँपालिकामा अध्ययन गरी सार्वजनिक गरिएको प्रतिवेदनमा क्षतिको कारण पहिरो नै पहिलो नम्बरमा रहेको जनाइएको छ ।
बाढीको जोखिम पनि जिल्लामा धेरै रहेको विगत र यस वर्षका घटनाले देखाएको छ । प्रतिवेदनमा जनावर आतंक, आगलागी, सडक दुर्घटना, हुरी बतास, चट्याङलगायत विपद् पनि रहेको उल्लेख गरिएको छ । स्थलगत अध्ययन, विगतमा भएका विपद्का घटना र जिल्ला प्रशासन कार्यालयमा आएका निवेदनहरूका आधारमा नुवाकोटमा पहिरोको जोखिम धेरै रहेको प्रमुख जिल्ला अधिकारी तथा जिल्ला दैवीप्रकोप उद्धार तथा विपद् व्यवस्थापन समितिका संयोजक उद्धवबहादुर थापाले बताए ।
‘पहिरोलाई बढी जोखिम ठानेर अन्य विपद्लाई बेवास्ता गर्नु हुँदैन । सबैखाले विपद्को जोखिमलाई न्यूनीकरण गर्न ध्यान दिनुपर्छ’, उनले अगाडि भने । विभिन्न संघसंस्थाको सहयोगमा निर्माण गरिएको ‘जिल्ला विपद् पूर्वतयारी तथा प्रतिकार्य योजना’ले जिल्लामा विपद् जोखिम न्यूनीकरण गराउन महत्वपूर्ण भूमिका खेल्ने उनको तर्क छ । पहिरोले नुवाकोटका सडकमा क्षति पु¥याउँदा आवतजावतमा समेत समस्या आएको छ ।
प्रतिक्रिया दिनुहोस !
