कालिकोट : कर्णाली प्रदेशकै आकर्षक जलाधार क्षेत्र मानिने तिला जलाधार क्षेत्रको संरक्षणको लागि स्थानीय जनप्रतिनिधिहरुले चासो देखाएका छन् । उनीहरुले उक्त जलाधार क्षेत्रको संरक्षणका उपायबारे दुईदिने छलफल गरेका हुन् ।
कालिकोटको मान्ममा बिहीबारदेखि भएको सामुहिक छलफलमा तिला जलाधार क्षेत्र अन्ततरगत कालिकोटको खाँडाचक्र नगरपालिका, तिला गुफा नगरपालिका, शुभकालिका गाँउपालिका, महाँवै गाँउपालिका र जुम्लाको तिला गाँउपालिकाका जनप्रतिनिधि सहभागी थिए ।
छलफलको क्रममा तिला नदी दिन प्रतिदिन प्रदुसित हुँदैगएको भन्दै चिन्ता पनि व्यक्त भएको छ । स्थानीय सरकारले समयमै उपाय नखोजे भविस्यमा पानीको श्रोत लोप हुनसक्ने खतरा पनि कार्यक्रममा औंल्याइयो ।
नदी आसपासका बजारमा निर्माण गरिएका घरका ढल सिधै नदीमा मिसाइदिँदा यस्तो खतरा निम्तिएको भन्दै यसलाई कडाइका साथ रोक्नुपर्ने भन्दै जनप्रतिनिधिहरुको चासो छ ।
तिला जलाधार क्षेत्रमा २७ प्रकारका माछा पाइन्छन् । पछिल्लो समय प्रदुषणका कारण माछा लगायतका धेरै जलचर लोप हुन थालेका छन् । साथै पानीको मात्र पनि कम हुँदै गएको छ।
प्रतिक्रिया दिनुहोस !
