काठमाडौं : ललितपुर जिल्ला राष्ट्रिय खुला टेनिस प्रतियोगिताको महिला एकलतर्फको उपाधिका लागि माहिका राणा र प्रेरणा कोइरालाबीच भिडन्त हुने भएको छ। सातदोबाटोस्थित टेनिस कोर्टमा सोमबार भएको सेमिफाइनल खेलमा माहिकाले अभिलाषा विष्टमाथि ६-२, ६-१ अंकको सजिलो जित हासिल गरिन्। प्रेरणा भने सेमिफाइनल खेलमा मायांका राणालाई ३-६, ७-६ (५), ६-४ ले हराउँदै उपाधि नजिक पुगेकी हुन्।
यसैगरी महिला डबल्सतर्फ जुम्ल्याहा दिदीबहिनी माहिका र मायांकाको जोडी तथा अभिलाषा विष्ट र ईरा रावतको जोडी फाइनलमा पुगेका छन्। माहिका र मायांकाको जोडीले सेमिफाइनल खेलमा एनी माथेमा र प्रेरणा कोइरालाको जोडीलाई ६-४, ६-० को सोझो सेटमा पराजित गर्यो। अर्को सेमिफाइनलमा अभिलाषा र ईराको जोडीले अस्लेषा लिसानोभिच र क्याथ्रिन माथेमाको जोडीलाई पाखा लगायो।
यसैगरी पुरुष डबल्सतर्फ सन्तोष खत्री र जितेन्द्र परियार तथा कमल भण्डारी र प्रणव खनालको जोडी फाइनलमा पुगे। पुरुष एकलतर्फ प्रदीप खड्का, जितेन्द्र परियार, सन्तोष खत्री र निक रास्त्रुप सेमिफाइनलमा प्रवेश गरेका छन्।
प्रतिक्रिया दिनुहोस !
