पाँच करोडको आलु बिक्री
त्रिशूली : हिमाली भेगमा उत्पादित आलुप्रति सर्वसाधारणको आकर्षण बढिरहेको छ । रसुवाको उत्तरपश्चिमी भेगमा रहेको गत्लाङका किसानले उत्पादन गरेको आलुले निकै राम्रो बजार पाएको छ । रसुवाको सदरमुकाम धुञ्चेबाट ३५ किलोमिटर दुरीमा रहेको गतलाङमा भ्रमणका लागि आन्तरिक तथा बाह्य पर्यटक जाने गरेकोमा आफन्तलाई कोसेलीको रूपमासमेत आलु खरिद गरी लैजाने गरेका छन् ।
गतलाङमा यस वर्ष मात्र पाँच करोड रुपैयाँभन्दा बढीको आलु उत्पादन भएको स्थानीयबासी लाक्पासिङ लामाले बताए । आलुको मूल्य प्रतिकिलोग्राम २४ रुपैयाँ छ । स्थानीयवासीले रसुवाको धुन्चे, स्यानफ्रुबेसी, कालिकास्थान, नुवाकोटको विदुर, बट्टार, त्रिशूलीका साथै विभिन्न व्यापारिक केन्द्रमा आलु बिक्री गर्ने गरेका छन् ।
आलु त्यहाँको प्रमुख बाली हो । गतलाङ तामाङ समुदायको उल्लेख्य बसोबास रहेको स्थान हो । गतलाङका किसानले आलु बिक्री गरेर आएको आम्दानीले बालबालिकालाई अध्ययन गराउनुका साथै चामल, नुन, तेल र मसलालगायत दैनिक उपभोग्य सामग्री खरिद गरी जीविकोपार्जन गर्दै आएका छन् । स्थानीय चार सय घरपरिवारले तरकारी तथा पशुपालनबाट जीविकोपार्जन गर्दै आएका छन् ।
गत वर्ष एक करोड ५० लाखभन्दा बढीको चौंरीगाईको दूध, दुई करोड रुपैयाँ बराबरको सिमी तथा १० करोडको कृषि उपज बिक्री गर्ने गरेको स्थानीयबासी रुपसिङ तामाङले बताए । आमाछोदिङमो गाउँपालिकाको गतलाङ क्षेत्रमा होमस्टेसमेत सञ्चालन गरिएको छ ।
होमस्टेबाट स्थानीयले स्वरोजगारका साथै स्वदेशी तथा विदेशी पर्यटकबाट राम्रै आम्दानी गरिरहेको वाङ्छु तामाङ बताउँछन् । गत्लाङमा आलुका साथै हिमाली सिमी पनि उत्पादन हुने गरेको छ । काठमाडौंदेखि सहजै यातायातमा पुग्न सकिने गतलाङका बासिन्दालाई स्थानीयस्तरमा उत्पादित कृषि उपज तथा होमस्टेको आयले जीविकोपार्जनमा निकै सहजता गरेको छ । स्थानीयबासी पेम्वाछिरिङ तामाङकाअनुसार तरकारी खेतीका साथै गतलाङबासीले पुरानो पेसा भेडापालन र चौंरीपालन पनि गरिरहेका छन् ।
पर्यटकीय पार्वतीकुण्ड नजिक दुग्ध विकास संस्थानको चिज उत्पादन केन्द्रसमेत रहेको छ । केन्द्रले प्रतिलिटर ७० देखि ८० रुपैयाँमा स्थानीय किसानसँग चौंरीगाईको दूध खरिद गर्ने गरेको छ ।