राजविराज: राजविराज नगरपालिकामा चोरी भएको मोटरसाइकलको नम्बर प्लेट परिवर्तन गरी चलाउने चोरसहित नम्बर परिवर्तन गर्ने सहयोगीलाई प्रहरीले पक्राउ गरेको छ।
राजविराज नगरपालिका- ५ का वडा अध्यक्ष समिर झाले प्रयोग गरिरहेको मोटरसाइकल चोरी गर्ने र चोरीको सवारी साधनको नम्बर प्लेट परिवर्तन गर्ने कार्यमा संलग्न ग्यारेज सञ्चालकलाई २४ घण्टाभित्र मोटरसाइकलसहित पक्राउ गरिएको एसपी राजेन्द्र विष्टले बताए।
डीएसपी भावेश रिमालका अनुसार सुनसरीको इनरुवा नगरपालिका- ६ का हिमान्शुलाल कर्ण, सप्तरीको छिन्नमस्ता गाउँपालिका- ६ का सनत मण्डल, अग्निसाइर कृष्णसवरण गाउँपालिका- ३ का भुवन चौधरी र महुलीस्थित फोर्ड ग्यारेजका सञ्चालक खडक नगरपालिका-९ का कृष्णदेव चौधरीलाई पक्राउ गरेको छ।
प्रहरीले अग्नीसाइर कृष्णसवरण गाउँपालिका- १ स्थित महुली खोलाको पुल नजिकैबाट मोटरसाइकलसहित उनीहरुलाई पक्राउ गरेको हो।
उनीहरुले राजविराज नगरपालिका- ५ स्थित वडा अध्यक्ष झाले घरअगाडि राखेको स १ ब १०२४ नम्बरको मोटरसाइकल चोरी गरेका थिए। चोरी भएको सेतो नम्बर प्लेट चोरी गर्नेले परिवर्तन गरी स. ५ प ६३८८ नम्बरको प्लेट प्रयोग गरी चलाइरहेका थिए।
प्रतिक्रिया दिनुहोस !
