रुकुम पश्चिम : मुसिकोट नगरपालिका–१ मठमा निर्मित जिल्ला बालकल्याण समितिको भवनमा सशस्त्र प्रहरी बलको अस्थायी क्याम्प बसेको छ । जसकारण उक्त भवनलाई बालगृहका रूपमा विकास गर्न नसकिएपछि यतिबेला जिल्लाका जोखिममा परेका बालबालिकालाई जिल्लाबाहिरका बालगृहमा पठाउनुपर्ने बाध्यता छ ।
०६५ सालमा जिल्ला बालकल्याण समितिको अन्तरिक कोष, सामाजिक विकास कोष र तत्कालीन जिल्ला विकास समितिको संयुक्त लगानीमा करिब ५ सय वर्गमिटर क्षेत्रफलमा निर्मित यस भवनलाई बालगृहका रूपमा विकास गर्ने लक्ष्य थियो । बालगृह सञ्चालन गर्न आवश्यक काम अगाडि बढ्न नपाउँदै मंसिर १० मा भएको प्रदेश तथा प्रतिनिधिसभा निर्वाचनताका यस भवनमा सशस्त्र प्रहरी बलको अस्थायी क्याम्प राखिएको थियो ।
सशस्त्र प्रहरीका लागि अर्को व्यवस्थापन नहँुदा भवनलाई संस्थाले प्रयोग गर्न नसकेको जिल्ला बालअधिकार अधिकृत मानवीर ओलीले बताए । ‘बालकल्याण समितिको भवनमा अस्थायी रूपमा सशस्त्रले क्याम्प राख्ने त्यो बेला निर्माण भएको थियो । तर, त्यो क्रम यति लामो समय रहला भन्ने लागेको थिएन’, अधिकृत ओलीले भने, ‘सशस्त्र प्रहरीलाई अरू नै कुनै ठाउँमा स्थायी व्यवस्थापन गरेर त्यस भवन र क्षेत्रलाई बालगृहको रूपमा विकास गर्नुपर्छ ।’
सुरुमा अस्थायी रूपमा जम्मा ५० जना संख्यामा प्रहरी नायब उपरीक्षकको नेतृत्वमा रहँदै आएको सशस्त्र प्रहरी अब जम्मा १ सय ६० को संख्यामा स्थायी रूपमा एउटा गुल्म बस्न सुरु गरेको छ । सशस्त्रको क्याम्प बनाउने तयारी भइरहेको रुकुम पश्चिमका सहायक जिल्ला अधिकारी शेरबहादुर पुनले बताए ।
प्रतिक्रिया दिनुहोस !
