आफ्नै कामबाट सन्तुष्ट नभएको वीरगन्जका मेयरको स्विकारोक्ति

वीरगन्ज : प्रदेश नम्बर २ को एकमात्र महानगरपालिका वीरगन्जका मेयर विजय सरावगीले आफ्नो कामबाट आफैँ सन्तुष्ट बन्न नसकेको स्विकार गरेका छन् ।

मेयर पदमा निर्वाचित भएको एक वर्षको अवधिमा आफूले गरेका कामबाट पूर्ण रुपमा सन्तुष्ट हुन नसकेको उनको स्विकारोक्ति छ । वीरगन्ज महानगरपालिकाका निर्वाचित जनप्रतिनिधीको एक वर्ष पूरा भएको अवसरमा शुक्रबार महानगरपालिकाले आयोजना गरेको पत्रकार सम्मेलनमा मेयर सरावगीले यस्तो आत्मालोचना गरेका हुन् ।

अधिकांश समय महानगरको ऐन, कानुन र नीति निर्माण तथा कर्मचारी व्यवस्थापनमै खर्चिनु परेको उनको अनुभव छ । उनले भने, ‘यो एक वर्षको अवधिमा भएका कामबाट म आफैँ पनि पूर्ण रुपमा सन्तुष्ट छैन, जति मैले चाहेको थिएँ त्यति गर्न सकेको छैन ।’

उनले थपे, ‘जति साधन श्रोत र जनशक्ति उपलब्ध भयो त्यसको भरपुर उपयोग गरेर आफूले सकेको जति काम भने गरेको छु, ५ वर्षको पूरा कार्यकालमा भने मैले सबै प्रतिबद्धता पूरा गरिछाड्छु ।’

अहिलेसम्म महानगरले बनाएका चार सय ३२ वटा योजनामध्ये दुई तिहाइ योजना कार्यान्वयन भइसकेको पनि उनको भनाइ छ । दोस्रो नगरसभाबाट आन्तरिक राजश्व ७४ करोड पुर्याउने लक्ष्यका साथ नीति तथा कार्यक्रम पारित गरिए पनि बजेट कार्यान्वयन नहुँदै विरोध भएपछि करको दर र दायरामा संशोधन गर्नुपरेको र त्यसले गर्दा आन्तरिक राजश्व २६ करोड घट्न गएको उनले बताए ।

आन्तरिक राजश्व घट्दा त्यसले चालु आर्थिक वर्षमा महानगरपालिकाले तर्जुमा गरेका योजनाको कार्यान्वयन गर्न कठिन भएको मेयरको गुनासो छ।