जर्जिया : जर्जियामा जारी ४३औं चेस ओलम्पियाडमा नेपालको पुरुष टोलीले आफ्नो उत्कृष्ट प्रदर्शन जारी राखेको छ । शनिबार एक दिनको विश्रामपछि आइतबार राति खेलिएको खेलमा नेपालले आफूभन्दा तीन स्थानमाथि रहेको श्रीलंकालाई २.५-१.५ अंकले हरायो । छैटौं चरणको जितसँगै नेपालले कुल आठ अंक बनाएको छ । चेस ओलम्पियाडमा नेपालको यो हालसम्मकै उत्कृष्ट नतिजा हो ।
नेपालले आगामी खेलमा यही लयलाई निरन्तरता दिए पदकको सम्भावना बलियो बन्ने निश्चित छ । नेपाल पुरुषतर्फ ३५ देश सम्मिलित समूह ‘डी’ को शीर्ष स्थानमा छ । नेपालका रिजेन्द्रराज भण्डारीले उत्कृष्ट प्रदर्शन गरिरहेका छन् । वरीयतामा एक सय १८औं स्थानमा रहेको नेपालले एक सय १५औं वरीयताको श्रीलंकामाथि जित निकाल्दा रिजेन्द्र र नेपाल च्याम्पियन मदनकृष्ण कायस्थले जित हात पारेका थिए ।
रिजेन्द्रले २१२१ रेटेड खेलाडी लसुरा अलाहाकनलाई पराजित गरे । मदनकृष्णले भने २१३९ रेटेड खलाडी निपुन पियुमन्थालाई हराए । रिजेन्द्रले ३६औं चालमा लसुरालाई निराश बनाएका थिए । उनले ६ खेलमा चार जित हात पारेका छन् । व्यक्तिगत ४.५ अंक बनाइसकेका रिजेन्द्र फिडे मास्टरको उपाधितर्फ पनि उन्मुख बनेका छन् ।
मदनकृष्णले भने ४६औं चालमा श्रीलंकाली खेलाडीलाई खेल त्याग्न बाध्य बनाएका थिए । अर्को खेलमा विवेक थिङले जीएम एच तिलकरत्नेसँग बराबरी खेले भने रूपेश जैसवाल श्रीलंकाका सञ्जुला मिनुलसँग पराजित भएका थिए । सातौं चरणको खेलमा नेपालले आफूभन्दा धेरै बलियो प्रतिद्वन्द्वी इटालीसँग प्रतिस्पर्धा गर्नेछ । इटाली वरीयताको ३४औं स्थानमा छ । इटालियन टोलीमा तीनजना जीएम छन् ।
यसैगरी महिलातर्फ छैटौं चरणको खेलमा नेपालले प्यालेस्टाइनसँग २-२ को बराबरी खेल्दै अंक बाँडेको छ । महिलामा त्यति जम्न नसकेको नेपालका लागि छैटौं चरणमा मोनालिसा खम्बु र सुजना लोहनीले जित निकाले । सिन्दिरा जोशी र खुश्बु थापा पराजित भए । सातौं चरणको खेलमा नेपाली महिला टोलीले आफूभन्दा बलियो टोली सुरिनामसँग प्रतिस्पर्धा गर्नेछ ।
प्रतिक्रिया दिनुहोस !
