काठमाडौं : यसअघि नै सेमिफाइनलको यात्रा तय गरिसकेको नेपालले भुटानमा जारी दक्षिण एसियाली फुटबल महासंघ (साफ) यू-१८ महिला फुटबल च्याम्पियनसिपको समूहगत चरणको आफ्नो अन्तिम खेलमा मंगलबार बलियो प्रतिद्वन्द्वी बंगलादेशसँग प्रतिस्पर्धा गर्दैछ । नेपालले यो खेलमा जित निकाल्दै समूह ‘ए’ को विजेता बन्ने लक्ष्य लिएको छ ।
यद्यपि नेपाललाई आफ्नो उद्देश्य पूरा गर्न सहज भने पक्कै हुने छैन । बंगलादेश प्रतियोगिताको उपाधि दाबेदार टोली हो । जारी प्रतियोगितामा गरेको प्रदर्शनको आधारमा पनि बंगलादेश नेपालभन्दा बलियो देखिएको छ । समूह एअन्तर्गतको पहिलो खेलमा नेपालले पाकिस्तानलाई १२-० गोलले पराजित गर्दा आइतबार भएको खेलमा बंगलादेशले त्यही पाकिस्तानविरुद्ध १७-० गोलको भारी अन्तरले हराएको थियो ।
त्यसैले नेपाललाई समूह एको विजेता टोली बन्न बंगलादेशविरुद्ध कुनै पनि अवस्थामा जित आवश्यक छ । नेपाली टोली पराजित भए वा बराबरीको नतिजा निकाले बंगलादेश नै समूह एको विजेता बन्नेछ । त्यसैले नेपालले आफ्नो अन्तिम खेलमा बंगलादेशविरुद्ध जितको रणनीति बनाएको हो । यो खेलको जितले प्रतियोगिताको बाँकी खेलमा नेपाली टोलीको मनोबल थप उच्च बन्नेछ । साफले पहिलो पटक आयोजना गरेको यो प्रतियोगिताको उपाधि उचाल्ने सम्भावना पनि नेपालको बलियो बन्नेछ ।
बंगलादेशविरुद्ध जित हात पार्न नेपाली टोलीले हरेक क्षेत्रमा सशक्त प्रदर्शन गर्नु आवश्यक छ । प्रतियोगितामा बंगलादेशको मिडफिल्ड र आक्रमण निकै सशक्त देखिएको छ । त्यसैले नेपाली मिडफिल्ड र स्ट्राइकरले बंगलादेशको रक्षापंक्तिलाई तोड्नु मात्र होइन, उनीहरूको आक्रमणलाई निस्तेज पार्न रक्षापंक्तिले पनि निकै मेहनत गर्नु आवश्यक छ । भुटानको चामलिमिथाङ राष्ट्रिय स्टेडियममा हुने खेल स्थानीय समयअनुसार बेलुका ७ बजे सुरु हुनेछ ।
प्रतिक्रिया दिनुहोस !
