बैतडी : जिल्लाका धेरैजसो स्वास्थ्य संस्थामा औषधि अभाव छ। समयमै औषधि खरिद प्रक्रिया सुरु हुन नसक्दा अभाव भएको डिलासैनी गाउँपालिकाका स्वास्थ्य संयोजक रामसिंह खत्रीले बताए। उनले भने, ‘स्थानीयस्तरमा पनि औषधि खरिद प्रक्रिया लामो छ। केन्द्र र जिल्लाबाट औषधि आउनै छाड्यो।’ स्वास्थ्य संस्थाबाट प्रदान गर्ने भनिएका औषधि प्रायः अभाव भइरहने उनले बताए।
जिल्लाको पुरचौैडी नगरपालिकाको कार्यपालिकामा स्वास्थ्यका कार्यक्रम पेस गरिए पनि स्वीकृत हुन नसकेको नगरपालिकाका स्वास्थ्य संयोजक विनोदकुमार कुँवरले बताए। उनले भने, ‘कार्यक्रम नै स्वीकृत नहुँदा औषधि खरिद प्रक्रिया ढिलो होलाजस्तो छ। जिल्ला र क्षेत्रबाट औषधि आएको छैन। सबै स्वास्थ्य संस्थामा औषधि अभाव हुन थालेको छ। एक महिनाभित्र खरिद गर्न नसकिए स्टक आउट हुन्छ।’
जिल्लाको शिवनाथ गाउँपालिकाअन्तर्गत स्वास्थ्य संस्थामा पनि औषधि अभाव चुलिएको स्वास्थ्य संयोजक जगदीश भट्टले बताए। उनले भने, ‘जिल्ला र क्षेत्रबाट औषधि आउने हल्ला थियो। तर, अझै औषधि आइपुगेन। बल्ल गाउँपालिकाले औषधि खरिद प्रक्रिया सुरु गरेको छ। एक महिनाभित्र औषधि पु¥याउने तयारी गरिरहेका छौं।’दुर्गम ग्रामीण क्षेत्रका स्वास्थ्य संस्था मात्र नभई सदरमुकामस्थित जिल्ला अस्पतालमा पनि आवश्यकताअनुसार औषधि पूर्ति हुन सकेको छैन। नगरपालिकामार्फत औषधि खरिद प्रक्रिया सुरु भएदेखि कुनै न कुनै रूपमा औषधि अभाव हुने गरेको जिल्ला स्वास्थ्य कार्यालय बैतडीका प्रमुख डा. जगदीश विष्टले बताए।
उनले भने, ‘जिल्ला अस्पतालबाट ७० प्रकारका औषधि निःशुल्क प्रदान हुन्छ। तर, स्थानीय तहमातहत अस्पताल गएपछि औषधि पूर्ति सहज हुन सकेको छैन। समयमा औषधि खरिद प्रक्रिया सुरु हुँदैन। यसले समस्या निम्त्याइरहेको छ।’
जिल्लाका धेरैजसो स्थानीय तहमा औषधि अभाव देखिएको छ भने केही स्थानीय तहले थोरै मात्रामा भए पनि औषधि खरिद गरेका छन्। ‘पहिला औषधि खरिद भइसकेको छ भनेर पत्र आयो। हामीले औषधि खरिद गरेनौं। समयमा औषधि नआउने भएपछि फास्ट ट्र्याकबाट करिब एक महिनाका लागि औषधि खरिद गरेका छौं’, मेलौली नगरपालिकाका स्वास्थ्य संयोजक नारायण चन्दले भने, ‘क्षेत्रीय मेडिकल स्टोरबाट समेत औषधि आएको छैन। यसले गर्दा समस्या हुने गरेको छ।’
धनगढीस्थित क्षेत्रीय मेडिकल स्टोरमा औषधि खरिद भए पनि ढुवानीका लागि आवश्यक रकम नहुँदा उतै थन्किएको बताइएको छ। ‘क्षेत्रीय मेडिकल स्टोरमा औषधि खरिद भएको हामीलाई थाहा भएको छ। ढुवानीको रकम नहुँदा रोकिएको जानकारी आएको छ’, जिल्ला स्वास्थ्य कार्यालय बैतडीका प्रमुख डा. विष्टले भने।
स्वास्थ्य संस्थामा आफूहरूलाई आवश्यक औषधि नपाउने गरेको सेवाग्राहीको गुनासो छ। स्वास्थ्य संस्थामा पुग्दा औषधि नै छैन भन्ने जवाफ आउने गरेको सुर्नया–६ का प्रकाश अवस्थीले बताए। उनले भने, ‘समान्य खालका सिटामोल, आइरन चक्कीसमेत उपलब्ध छैन। यसले गर्दा बिरामीलाई समस्या भएको छ।’
आयुर्वेदिक औषधि पनि अभाव
जिल्लामा रहेका आयुर्वेदिक स्वास्थ्य संस्थामा पनि औषधि अभाव भएको छ। पछिल्लो समय आयुर्वेदिक औषधि सेवन गर्ने बिरामीको संख्या बढे पनि औषधि अभाव भएपछि रित्तो हात फर्काउनुपरेको आयुर्वेद स्वास्थ्य केन्द्र मुस्याचोरका रामदत्त भट्टले बताए। उनले भने, ‘मेलौली, सदरमुकाम र मुस्याचोरमा गरेर तीन ठाउँका आयुर्वेद स्वास्थ्य केन्द्रमै औषधि अभाव भएको छ’, उनले भने।
प्रतिक्रिया दिनुहोस !
