लहान : सानो कमेडी फिल्ममा अभिनय गरेकै कारण सिराहाको लहान नगरपालिका–८ स्थित मोडेल एजुकेशनल एकेडेमीले कक्षा १० मा अध्ययनरत एक छात्रालाई निष्कासन गरेको छ । सिराहा नगरपालिका–१८ माडर घर भएकी छात्रा संजना मण्डललाई उक्त निजी स्कुलले निष्कासन गरेको हो ।
कमेडी फिल्ममा अभिनय गरेर चरित्रहीन बनेको बताउँदै प्रिन्सिपल इन्द्रदेव मण्डलले स्कुलबाट निकालेको पीडित छात्रा संजनाले बताइन् । प्रिन्सिपलले अबदेखि स्कुलमा प्रवेश गरे ठिक नहुने चेतावनीसमेत दिएको उनले सुनाइन् ।
प्रिन्सिपलले नै निष्कासन गरेपछि छात्रा संजना दुई दिनदेखि पढ्न गएकी छैन । उनकी आमा शितल मण्डलले एसइई परीक्षा दिन मात्र ६ महिना बाँकी रहँदा विद्यालयबाट निकालेपछि छोरी बिचल्लीमा परेको बताइन् ।
छोरीको पढाई बिग्रिने डरले चिन्तामा डुबेकी उनले भनिन् ‘स्कुलबाट यस्तो अवस्थामा निष्कासन गर्यो अब अन्य कुनै विद्यालयमा यो बेला भर्ना पनि लिँदैन ।’
संजनाका दुई बहिनी र एक भाइ पनि त्यही स्कुलमा पढ्दै आएका थिए । तर उनीहरूलाई पनि शौचालय सफा गर्न र खाना पकाउन लगाएपछि अभिभावकले अन्य स्कुलमा भर्ना गराए । त्यस दिनदेखि नै प्रिन्सिपल मण्डलले छात्रा संजनालाई विभिन्न बहानामा यातना दिँदै आएका थिए ।
‘निकालेका छोराछोरीलाई फेरि यही स्कुलमा पुनः भर्ना गराऊ भन्ने धम्की दिइएको थियो, संजनालाई पनि पढ्न नदिने धम्की दिँदै आएका थिए’ उनले भनिन्, ‘अहिले कमेडी फिल्म खेलेपछि बहाना भेट्यो । त्यही बहानामा स्कुलबाट निष्कासन गरेर छोरीको भविष्य बिगार्न खोजियो ।’
उनले छोरीको भविष्य बचाइदिन सम्बन्धित निकायसँग माग गरेकी छन् । यता प्रिन्सिपल मण्डलले ग तल काम गरेपछि स्कुलबाट निकालेको दाबी गरेका छन् । तर के गलत काम गरिन् भन्ने उनले खुलाएनन् ।
‘कसले भन्यो स्कुलबाट निष्कासन गर्यो ? यो विषयमा भेटेर कुरा गर्छु,’ प्रिन्सिपल मण्डलले थपे, ‘होइन भने निकालिएकी छात्राले के–के गुनासो गरिन् सबै कुरा लेखिदिनुस् ।’
प्रतिक्रिया दिनुहोस !
