पार्टी र जनप्रतिनिधिबीच सम्बन्ध चिसियो : मुख्यमन्त्री गुरुङ

स्याङ्जा : गण्डकी प्रदेशका मुख्यमन्त्री पृथ्वीसुब्बा गुरुङले जनप्रतिनिधि र राजनीतिक दलबीच समन्वय नभएको गुनासो गरेका छन् ।

विकास निर्माणका काममा जनप्रतिनिधि र पार्टीबीच हातेमालो हुनुपर्नेमा अन्य राजनीतिक दललाई पाखा लगाउँदा जनप्रतिनिधिको उपलब्धी नदेखिएको बताए । वालिङ नगरपालिका–४ स्थित एलादी स्वास्थ्य चौकीको बिहीबार उद्घाटन गर्दै मुख्यमन्त्री गुरुङ्ले यसो भनेका हुन् । उनले भने, ‘पार्टी र जनप्रतिनिधि बीच सम्बन्ध चिसिँदै गएको छ । स्थानीय तहमा सचिवालयय बनाएर सम्बन्ध बिस्तार गर्नुपर्छ ।’

नेकपाको प्रदेश इन्चार्जको जिम्मेवारी पाएपछि पहिलोपटक स्याङ्जा आएका गुरुङ्ले स्थानीय तहका कार्यकर्तामा पार्टी नभए झैँ भान भएको टिप्पणी गरे ।

यसबाहेक गुरुङले दुई पार्टीबीचको एकता भएको एक वर्ष पुग्दा पनि पूर्णता नपाउनु दुखद् रहेको भनेका थिए । यहाँ स्वास्थ्य चौकी भवन १ करोड ४७ लाख ५० हजारको लागतमा निर्माण भएको हो । १६ कोठा भएको तीनतले उक्त स्वास्थ्य चौकीबाट यहाँका करिब १५ हजार स्थानीय नागरिकले सेवा लिनसक्ने अनुमान गरिएको छ।