नुवाकोट : नेपाली कांग्रेसका सह–महामन्त्री डा. प्रकाशशरण महतले वाम गठवन्धनको सरकार एक वर्ष नपुग्दै अधिनायकवादी भएको आरोप लगाएका छन् । दुईतिहाइका नाममा कम्युनिष्ट सरकारले जनतामाथि शासन गरिरहेको उनको भनाई छ ।
जनतालाई सपनाको भ्रमजालमा पारेर केपी ओली नेतृत्वको सरकारले सत्तामा पुगेपछि कम्युनिष्टहरुको असली चरित्र देखाएको आरोप लगाउँदै उनले व्यवहारबाटै तानाशाही देखिएको पनि बताए ।
बेलकोटगढी नगरपालिका–७ को महादेबफाँटमा आयोजित कार्यक्रममा सह–महामन्त्री डा. महतले जनताको समस्या समाधान र सुशासन कायम गर्न बर्तमान सरकार पूर्ण असफल भइसकेको दाबी गरे ।
मुलुकमा हत्या, हिंसा, बलात्कार, महँगी र अराजकता मौलाउँदा पनि बर्तमान सरकारमा संवेदनशीलता नदेखिनु जनमतको घोर अपमान भएको बताए ।
वर्तमान सरकारको सुशासन र समृद्धिको नारा खोक्रो नारा र आदर्शमा सीमित भइसकेको बताउँदै सह–महामन्त्री डा. महतले जनताले राज्यविहीनता महसुश गर्ने अवस्था बन्दै गए कांग्रेस सशक्तरुपमा सरकारी रबैयाविरुद्ध आन्दोलित हुने चेतावनी दिए ।
कार्यक्रममा डा. महतले नेपाली कांग्रेस भित्रको आन्तरिक एकताको पाटो मजबुत बनाउन वर्तमान नेतृत्व प्रयत्नरत रहेको बताउँदै केन्द्रदेखि स्थानीय तहसम्म पार्टीको पुनर्जीवनका लागि प्रयत्नरत रहन कार्यकर्ताहरुलाई निर्देशन समेत दिए ।
मजबुत आन्तरिक एकता र सुदृढ संगठनको बलमा कम्युनिष्टहरुको अधिनायकवादी सपनालाई तोड्नुपर्ने बताउँदै सह–महामन्त्री महतले अबको समय चिन्ता गरेर बस्ने भन्दा पनि जनताको चित्तबुझ्दो संगठन बनाउन केन्द्रित हुनुपर्ने बताए ।
प्रतिक्रिया दिनुहोस !
