वीरगन्ज : निर्माण कम्पनी कालिका कन्स्ट्रक्सनको लापरवाहीका कारण वीरगन्जमा सोमबार साँझ चारजना बालबालिका मृत्युको मुखमा पुगेर बाँच्न सफल भएका छन् ।
जिल्ला प्रहरी कार्यालय पर्सा अगाडि रहेको लालबंगला दरबारको खाली जग्गामा कालिका कन्स्ट्रक्सन प्रालिले चाङ लगाएर महिनौ दिनदेखि थुपारेको ह्युम पाइपले च्यापिएर वीरगन्ज–९ रानीघाटका चारजना बालबालिका गम्भीर घाइते भएका हुन् ।
वीरगन्ज महानगरमा भूमिगत ढल र नाला निर्माणका लागि ठेक्का सकारेको कालिका कन्स्ट्रक्सनले लालबंगला परिसरमा तीन महिनादेखि एक हजार भन्दा बढी सिमेन्टेड ह्युम पाइप चाङ लगाएर राखेको थियो
चाङ लगाएर राखिएका ह्युम पाइप छेउमा सोमबार साँझ खेल्ने क्रममा रानीघाटका चारजना बालबालिका च्यापिएएका हुन् । च्यापिएकामध्ये तीनको अवस्था गम्भीर छ ।
घटनामा जीराभवानी गाउँपालिका–१ स्थायी घर भइ हाल वीरगन्ज–९ रानीघाटमा बस्दै आएका गोविन्द चौधरीका छोरी १० वर्षीया अनुष्का चौधरी र सात वर्षकी अंकिता चौधरी घाइते भएका छन् । त्यसैगरि
वीरगन्ज–९ रानीघाटका राकेश यादवकी छोरी नौ वर्षीया आयुषा यादव र रानीघाटकै बालमुकुन्द राउत चौधरीका छोरा ८ वर्षीय रोहित चौधरी घाइते भएका हुन् । घाइतेमध्ये रोहीत र आयुषाको नारायणी उपक्षेत्रीय अस्पतालमा र अंकिता र अनुष्काको वीरगन्ज हेल्थ केयर अस्पतालमा उपचार भइरहेको छ ।
रोहित, अनुष्का र अंकिताको अवस्था गम्भीर रहेको पर्साका प्रहरी नायव उपरिक्षक सत्यनारायण थापाले जानकारी दिए । सोमबार साँझ साढे ५ बजे तिर लालबंगला परिसरमा खेल्ने क्रममा ह्युम पाइपले चार जना बालबालिकालाई च्यापेपछि तत्कालै उनस्हरुको उद्धारका लागि घटनास्थलमा चारवटा लोडर र एउटा डोजर पुगेको थियो ।
घटनास्थलमा पुगेका जेसीबी र डोजरको मद्धतमा नेपाल प्रहरी, सशस्त्र प्रहरी नेपाली सेना र वीरगन्ज महानगरका कर्मचारीले सुरुमा अंकिता र अनुष्काको उद्धार गरि उपचारका लागि वीरगन्ज हेल्थ केयर अस्पतालमा पठाएका थिए ।
त्यसको आधा घण्टापछि उद्धारकर्मीहरुले आयुषा र रोहितलाइ पनि उद्धार गरि उपचारका लागि नारायणी उपक्षेत्रीय अस्पतालमा पु¥याइएको उद्धारमा संलग्न नेपाली सेनाका मेजर हरि पाण्डेले जानकारी दिए ।
अस्पतालमा उपचार गराइरहेका मध्ये रोहित र अनुष्काको अवस्था अरुको भन्दा जटिल रहेको उपचारमा संलग्न चिकित्सकहरुले बताएको प्रहरी नायव उपरिक्षक थापाले जानकारी दिए ।
महानगरमा भूमिगत ढल नाला निर्माणको ठेक्का लिएको कालिकाले काम सुरु गर्नु भन्दा महिनौ दिन पहिले लाल दरबारमा हजारौंको संख्यामा ह्युम पाइप थुपारेर व्यवस्थापनमा लापरवाही गरेकाले सोमबार साँँझ दुर्घटना भएको रानीघाटका स्थानीय रमेश कलवारले बताए ।
प्रतिक्रिया दिनुहोस !
