वीरगन्ज : वीरगन्जमा सोमबार साँझ ह्युम पाइपले च्यापिएर घाइते भएका तीन बालिकालाई यहाँका सांसद प्रदीप यादवले उपचारका लागि आर्थिक सहायता गरेका छन् ।
घटनामा घाइते भइ काठमाडौंको बिएण्डबी अस्पतालमा उपचार गराइरहेका गोविन्द चौधरीका छोरी १० वर्षीया अनुष्का र ७ वर्षीया अंकिताको उपचार खर्च पर्सा क्षेत्र नम्बर १ का सांसद प्रदीप यादवले ब्यहोरेका हुन् ।
पर्साको जीराभवानी गाउँपालिका–१ स्थायी घर भइ हाल वीरगन्ज–९ रानीघाटमा बस्दै आएका गोविन्द चौधरीको परिवारलाई सांसद यादवले उपचारका लागि ५० हजार रुपैयाँ नगद दिएका हुन् ।
सोही घटनामा घाइते भइ वीरगन्जमा उपचार गराइएकी ९ वर्षीया आयुषा यादवलाई पनि २५ हजार रुपैयाँ उपचार खर्च दिने बताएका छन् । वीरगन्ज–९ रानीघाटका राकेश यादवकी छोरी आयुषाको उपचार खर्च मङ्लबार नै दिने सांसद यावले बताए ।
सोमबार साँझको घटनामा परी ज्यान गुमाएका रानीघाटका बालमुकुन्द राउत चौधरीका ८ वर्षीय छोरा रोहीत चौधरीको परिवारलाई पनि वीरगन्ज पुगेपछि ५० हजार रुपैयाँ प्रदान गर्ने सांसद यादवले प्रतिवद्धता जनाएका छन् ।
साथै सांसद यादवले ह्युम पाइप थुपार्ने कालिका कन्स्ट्रक्सनलाई कारवाही गर्न सरकारलाई माग गरेका छन् । संघीय समाजवादी फोरम नेपाल पर्साका अध्यक्ष समेत रहेका सांसद प्रदीपले सोमबार साँझको घटनाको छानविन गर्न प्रतिनिधिसभाका सभामुख कृष्ण बहादुर महरा र गृहमन्त्री राम बहादुर थापालाई भेटेर आग्रह गर्ने बताएका छन् ।
प्रतिक्रिया दिनुहोस !
