तेजाव हानेर सम्झनाको ज्यान लिने रामबाबु जेल पुगे
गौर : यहाँका दुई दिदीबिहनीलाई तेजाव प्रहार गरेको आरोपमा पक्राउ परेका रामवावु पासवानलाई जिल्ला अदालत रौतहटले पुर्पक्षमा राख्ने आदेश दिएको छ ।
चन्द्रपुर नगरपालिका–६ की १८ वर्षीया सम्झना कुमारी दास र उनकी बहिनी १५ वर्षीया सुस्मिता कुमारीमाथि तेजाव प्रहार गरेको आरोपमा पक्राउ परेका छिमेकी रामबाबु पासवानलाई प्रहरीले अनुसन्धानपछि मंगलवार सरकारी वकिलको कार्यालयमार्फत अदालतमा बुझाएको थियो ।
न्यायधीश अम्बिका निरौलाको इजलासले पासवानलाई पुपक्र्षमा राखेर कार्वाही अगाडी बढाउने आदेश भएको जिल्ला अदालत रौतहटका श्रेस्तेदार गुणराज पराजुलीले जानकारी दिएका छन । तेजाव प्रहारबाट गम्भीर घाइते भएकी सम्झनाको उपचारको क्रममा ज्यान गएको थियो ।
तेजाव प्रहार गरेको घटनाको ६ दिनपछि प्रहरीले बिरामीको कुरुवा बस्न गएका घाइतेहरुका छिमेकी पासवानलाई कीर्तिपुर अस्पतालबाट पक्राउ गरेको थियो । पक्राउ परेका पासवान पीडित किशोरीहरुका बुवा जादोलाल दाससँगै कीर्तिपुरस्थित अस्पतालमा कुरुवा बस्न काठमाडाँै गएका थिए ।
गत भदौ २६ गते राति करिब १२ बजे सम्झना र सुस्मिता दास सुतिरहेको अवस्थामा तेजाव प्रहार भएको थियो । १८ वर्षीया सम्झनाको उपचारका क्रममा असोज ८ गते बिहान मृत्यू भएको थियो । उनको ३५ शरिर ३५ प्रतिशत भन्दा बढी तेजावले जलेको थियो ।
बहिनी सुस्मिता उपचारपछि घर फर्किएकी छिन । उनको पाखुरामा घाउ निको हुन बाँकी रहेकाले बेलाबेलामा चिकित्सकलाई देखाउनुपर्ने बाबु जादोलालले बताएका छन् । रामबाबुले मृतक १८ वर्षीया सम्झाना कुमारीलाई एकतर्फी प्रेम गर्दै आएको प्रहरी अनुसन्धान बाट खुलेको थियो ।
दासको मोबाइलको कल डिटेल, पीडित किशोरीका बाबुको किटानी जाहेरी, मृत्यु हुनु अघिको किशोरीको बयानको आधारमा पासवानलाई प्रहरीले नियन्त्रणमा लिएको थियो ।
तेजाव प्रहार गरेको घटनामा दोषी ठहरिए नयाँ मुलुकी अपराधसंहिता अनुसार अनुहार कुरुप पारे ५ वर्षदेखि ८ वर्ष कैद र १ देखि ५ लाखसम्म जरिवाना, शरिरको अन्य भाग कुरुप बनाए वा शरिरमा पीडा गराएमा ३ देखि ५ वर्षसम्म कैद र ५० हजारदेखि ३ लाख जरिवाना हुने व्यवस्था छ ।