काठमाडौं : नेता वामलेव गौतमका लागि सांसद पदबाट राजीनामा दिने तयारीमा रहेका रामवीर मानन्धरको बालाजु बाइपासस्थित ठूलै जमघट थियो । उक्त निर्वाचन क्षेत्रभित्र नेकपाका तर्फबाट निर्वाचित जनप्रतिनिधिहरु भेला भएका थिए । उनीहरुले सांसद मानन्धरलाई राजीनामाको तयारीबारे जिज्ञासा राखेका थिए ।
जनप्रतिनिधिका प्रश्न :
* अरु क्षेत्रले नमानेर हो कि, तपाईंलाई प्रलोभनमा पारेर हो कि , हाम्रो काँधमा चढेर तपाईंहरू लाभ लिने ? भोलि वामदेवले जित्लान्, प्रधानमन्त्री पनि होलान्, मानिलिऊँ। तर भोलि हामी त फिस्स ! उहाँ (वामदेव)ले दिएको आश्वासन कार्यान्वयन हुन्छ भन्ने ग्यारेन्टी के ? त्याग देखाउनु, पार्टीको निर्देशन मान्नु राम्रो हो। तर राजीनामा दिएको मान्छे भोलि फेरि यही स्थापित हुन गाह्रो पर्ला। ४ वर्षपछि मेरो स्थान के ? कहाँ गएर राजनीति गर्ने ? तपाईंले के सोच्नुभएको छ ?
* एक वर्ष बितिगयो, ४ वर्षपछि पनि चुनाव आउँछ। चार वर्षपछि वामदेव कमरेड उठे भइहाल्यो नि, पहिले नै जित्ने ठाउँमा किन उनी नउठेको ?
* हाम्रै क्षेत्र वामदेवलाई किन चाहियो ? तपाईंले छोड्नु उपयुक्त छैन। भइरहेको सांसदलाई राजीनामा गराएर अर्को सांसद बनाउछौं भनेर जनताका अगाडि कुन मुखले हामी भोट माग्न जाने ? हामी कार्यकर्ताको मनोबल कहाँ पुग्ला ? यो वा त्यो बहानामा धेरै गुलियो चीज खुवाइयो। तपाईं स्वयम्लाई प्रधानमन्त्रीले मन्त्री बनाउछु भन्नुभएको थियो। किन बनाउनु भएन ? के तपाईं अयोग्य र भागबन्डामा नपरेर हो ?
* ८ हजार मतले हामीले चुनाव जितेका छौं। तर यहाँ वामदेवले आएर जित्ने आधार के ? काठमाडौंमै माधव नेपालको क्षेत्रमा उपचुनावमा हामीले देखेका छौं। ८ हजारले जितेका थियौं, तर हार्यौं त। हामी कार्यकर्ताको सेक्युरेटी र हाम्रो भूगोलको चिन्ता खोई?
* १२ ठाउँमा प्रयास गर्दा पनि अरुले छोडेनन्। तर किन तपाईं चाहिँ सजिल्यै छाड्ने ? तपाईंले जित्ने बेला कति संर्घष गर्नुपरेको थियो ? पार्टीको चाहिने निर्णय मान्ने, प्रेसरका नचाहिने निर्णय किन मान्ने ? जित्ने ग्यारेन्टी छैन। छोडनु हुन्न।
रामवीरको जवाफ :
*पार्टी निर्णयको पालना हामी सबैले गर्नुपर्छ। हामीलाई टिकट पार्टीले दिने हो। कसले लियो र कसलाई दियो भन्ने कुरासँग भन्दा पार्टीसँग म मतलब राख्ने मान्छे हुँ। म ५७ वर्ष पुगें। मेरो लाइफलाइनमा मैले अहिले जति ‘गेन’ गरेको छु, त्यो धेरै हो। मेरो जति अवसर पाएका साथीहरू एक जना पनि मैले पाएको छैन।
* प्रचण्ड र केपी कमरेडलाई मिलाउन सबैभन्दा महत्वपूर्ण भूमिका खेलेका एउटा महत्वपूर्ण नेतालाई बाहिर राखेर हुँदैन। उहाँलाई कुनै न कुनै रूपमा सक्रिय राजनीतिमा ल्याउन दिने हाम्रो कर्तव्य पनि हो। हामीले सानातिना कुरामा हेर्नुहुँदैन। उहाँ आउँदा यो क्षेत्रको विकास हुन्छ। विकाससँग मैले पद साट्न खोजेको हुँ।
* मलाई आशंका ६ महिनादेखि नै थियो। वामदेव हार्नुभएको छ। खोज्दै आउनु हुन्छ। सबैभन्दा सजिलो मै छु। वामदेवसँग मेरो ०५१ सालदेखि अत्यन्त नजिकको सम्बन्ध थियो। त्यसबेला ९० जना सांसद पार्टी कार्यालयमा लुकाएका बेला मेरो घरमा राख्ने भनेर हेरिएको थियो। घर बाटोछेउमा भएकाले यहाँ बम हानियो भने के गर्ने ? यहाँ हुँदैन भनेर उहाँले भनेपछि बल्खुमा लगेर राखिएको थियो। अहिले त्यही भयो। उहाँका लागि मैले पद छाड्ने स्वीकृतिपत्र पार्टीलाई बुझाएर आएको छु।
प्रतिक्रिया दिनुहोस !
