वीरगन्ज : पर्साको पटेर्वासुगौली गाउँपालिका–४ फरहदवा गाउँबाट प्रहरीले अमेरिकामा बनेको स्वचालित पेस्तोलसहित एक युवकलाई पक्राउ गरेको छ ।
प्रहरीले बुधबार पटेर्वासुगौली गाउँपालिका–१ घर भएका २५ वर्षीय मनोज पासवानलाई पक्राउ गरेको हो ।
विशेष सुराकीको आधारमा सादा पोशाकमा खटिएका प्रहरीले फरहदवा गाउँमा रहेको भलुवही खोलाको बगर नजिकैबाट पासवानलाई स्वचालित पेस्तोल र त्यसमा लाग्ने म्याग्जिनसहित पक्राउ गरेको हो ।
सुगौली गाउँबाट निचुटातर्फ पैदल जादै गरेका पासवानलाई प्रहरीले भलुवाही खोलाको बगरमा रोकेर उनको शरीर खानतलाशी गर्दा उनको साथबाट मेड इन युएसए लेखिएको स्वचालित पेस्तोल र त्यसमा लाग्ने एउटा खाली म्याग्जिन बरामद भएको पर्साका प्रहरी नायव उपरीक्षक सत्यनारायण थापाले जानकारी दिए ।
पेस्तोल र म्याग्जिनसहित पक्राउ परेका पासवानलाई जिल्ला प्रहरी कार्यालयको हिरासतमाा राखेर अनुसन्धान अगाडि बढाइएको छ ।उनीविरुद्ध हातहतियार तथा खर खजाना मुद्दा चलाउने तयारी भइरहेको प्रहरी नायव उपरीक्षक थापाले जानकारी दिए ।
प्रतिक्रिया दिनुहोस !
