दमौली : बलात्कार अभियोगमा ५ महिनादेखि फरार घिरिङ गाउँपालिका–४ का वडाध्यक्ष झकबहादुर कुमाललाई नेकपाको संरक्षण रहेको पार्टीकै नेताले स्वीकारेका छन् । वैशाख ३१ गते घिरिङ–४ की विवाहित महिलालाई नवलपरासी बर्दघाट सुस्तापूर्वको बौंदीकाली डेढगाउँस्थित जंगलमा बलात्कार गरेको आरोप लागेयता कुमाल फरार छन् । राजनीतिक संरक्षणका कारण उनलाई प्रहरीले पक्राउ नगरेको आरोप लागिरहेका बेला नेकपाका केन्द्रीय सदस्य प्रतापलाल श्रेष्ठले कुमाल आफुहरुको नियमित सम्पर्कमा रहेको खुलासा गरेका हुन् ।
नेता श्रेष्ठले फरार वडाध्यक्ष कुमालका कारण प्रहरीलाई पनि अप्ठ्यारो भएको भन्दै चाँडै बुझाइने जानकारी दिए । ‘हामी उहाँ (कुमाल)लाई प्रहरी कहाँ चाँडै बुझाउँछौं’, श्रेष्ठले भने, ‘प्रक्रिया मिल्न मात्र बाँकी छ ।’ तत्कालीन एमालेका तर्फबाट वडाध्यक्ष विजयी कुमाल बलात्कार घटनापछि कार्यवाहक छाडेर सम्पर्कविहिन छन् । उनी गाउँमै रहेकाले गाउँ जान असुरक्षित भएको पीडित महिलाले सञ्चारकर्मीसँग बताउँदै आएकी छन् ।
गाउँ छाडेर दमौलीमा बस्दै आएकी पीडित महिलासँग पटकपटक सम्पर्क गर्न खोजे पनि सम्भव नभएको नेकपा केन्द्रीय सदस्य श्रेष्ठले बताए । ‘हामीले उहाँ (पीडित महिला)लाई भेट्न खोज्दा पनि दिइएन’, उनले भने । कुमाललाई प्रहरीले पक्राउ नगरेको विषय प्रदेशसभामा पटक–पटक उठेको थियो । प्रदेशसभा सदस्य सरीता गुरुङले कुमाललाई पक्रन नसकेकामा सरकारको आलोचना गरेकी थिइन् ।
काँग्रेसनिकट महिला संघले कुमाललाई पक्रन दमौलीमा विरोध प्रदर्शन गरेको थियो । मुख्यमन्त्री पृथ्वीशुब्बा गुरुङ बुधबार प्रहरी दिवसको कार्यक्रममा आएका बेला व्यास नगरप्रमुख बैकुण्ठ न्यौपानेले समेत सो विषय उठाएका थिए । पार्टीको नाम चौतर्फी मुछिएपछि प्रतिनिधि सभासदस्य कृष्णकुमार श्रेष्ठले आरोप लागेका कसैलाई पार्टीले संरक्षण नगर्ने प्रष्टीकरण दिनुपरेको थियो ।
प्रहरी उपरीक्षक सिद्धिविक्रम शाहले कुमाललाई पक्राउ नगर्न दबाब नरहेको दाबी गरिरहँदा नेकपा केन्द्रीय नेताले प्रहरीकै कार्यक्रममा पार्टीको संरक्षण रहेको स्विकार गरेका हुन् । पक्राउ गर्न धेरैपटक कुमालको गाउँ पुगेर पनि रित्तो हात फर्किएको प्रहरीले उनले लोकेशन फेरिरहँदा समस्या परेको बताउँदै आएको थियो ।
प्रतिक्रिया दिनुहोस !
