काठमाडौं : सन् २०१४ को विश्वविजेता जर्मनीको खराब लय रोकिएको छैन । रसिया विश्वकपमा समूह चरणबाटै बाहिरिएको जर्मनीले गएराति अर्को झट्का भोग्यो । युएफा नेसन्स लिग फुटबल अन्तर्गत गएराति भएको जर्मनीलाई नेदरल्यान्ड्सले ३-० गोलअन्तरले पराजित गरेको हो ।
नेसन्स लिगअन्तर्गत लिग 'ए' समुह १ को खेलमा घरेलु टोली नेदरल्यान्ड्ससामू जर्मनी निरिह सावित भयो । जर्मनीलाई पराजित गर्ने क्रममा भर्जिल भान डाइक, मेम्फिस डिपे र जर्जिनियो बहाल्दुमले एक एक गोल गरेका थिए ।
जर्मनीलाई पराजित गरेपछिप नेदरल्यान्ड्स यो समूहमा दोस्रो स्थानमा उक्लिन सफल भएको छ । यस समूहमा फ्रान्सले २ खेलबाट ४ अंक जोडेर शीर्ष स्थानमा छ ।
समान खेलबाट ३ अंक जोड्दै दरल्याण्ड्स दोस्रो र १ अंक मात्रै जोडेको जर्मनी तेस्रो स्थानमा छ । नेदरल्यान्डससँग हारेपछि जर्मनीका प्रशिक्षक वाकिम लोउ झन् अफ्ठेरोमा परेका छन् । उनलाई जिम्मेवारी छाड्न दबाब बढिरहेको छ ।
सन् २०१४ को विश्व विजेता जर्मनी पछिल्लो समय लयमा छैन । उसले खेलेका पछिल्ला १२ खेलमध्ये ३ मा मात्रै जित निकाल्न सकेको छ ।
प्रतिक्रिया दिनुहोस !
