मलंगवा : सर्लाहीको लालबन्दी नगरपालिकामा आयोजित 'वडा अध्यक्ष फुटबल प्रतियोगिता' को उपाधि लालबन्दी वडा नं. ६ ले हात पारेको छ।
लालबन्दी १७ रानीगंजको फुटबल मैदानमा सोमबार आयोजना गरिएको फाइनल खेलमा वडा नं. ६ ले वडा नं. १७ लाई ३–२ गोलले पछि पार्दै उपाधि चुमेको हो।
खेलको ११ औं मिनेटमा वडा नं ६ को तर्फबाट जर्सी नं ११ का सनिल स्याङतानले पहिलो गोल गरेका थिए। त्यसको ७ मिनेटमै १७ का तर्फबाट जर्सी नं. १० का रितिक अधिकारीले गोल गर्दै खेललाई बराबरीमा ल्याएका थिए। त्यसैगरि खेलको ३७ मिनेटमा वडा नं. ६ का तर्फबाट जर्सी नं ८ का गणेश चौधरीले दोश्रो गोल गरेपछि पहिलो हाफको खेल २–१ मा रोकिएको थियो।
वडा नं ६ का तर्फबाट ६४ औं मिनेटमा जर्सी नं ७ का राकेश विकले टिमका लागि तेस्रो गोल गरेका थिए। ३–१ ले पछि परेका वडा नं १७ ले गोल गर्नका लागि घम्साघम्सी गर्दै खेलको ७८ औं मिनेटमा जर्सी नं १० कै रितिक खड्काले गरेको दोस्रो गोलमै वडा नं १७ ले चित्त बुझाएको थियो।
प्रतियोगिताको विजेता टिमलाई नगद ५१ हजार रुपैयाँसहित कप र प्रमाणपत्र वितरण गरिएको थियो भने दोस्रो हुने टिमलाई नगद २५ हजार ५ सय रुपैयाँसहित कप र प्रमाण पत्र प्रदान गरिएको थियो।
प्रतियोगिताको सर्वोत्कृष्ट खेलाडीको उपाधि वडा नं. ६ का सनिल स्याङतानलाई प्रदान गरिएको छ। वडा नं. १७ को आयोजनामा खेल असोज २१ गतेदेखि सुरु गरिएको थियो।
प्रतिक्रिया दिनुहोस !
