काठमाडौं : थाइल्यान्डमा बुधबारदेखि सुरु हुने एएफसी यू– १९ महिला च्याम्पियनसिप छनोट प्रतियोगितामा सहभागी बन्न नेपाली महिला टोली सोमबार थाइल्यान्ड प्रस्थान गरेको छ । छनोट खेलमा नेपवाल समूह ‘बी’ मा परेको छ ।
यस समूहमा आयोजक थाइल्यान्डसहित नेपाल, भारत र पाकिस्तान रहेका छन् । समूहको पहिलो खेल नेपालले बुधबार आयोजक थाइल्यान्डसँग प्रतिस्पर्धा गर्नेछ । नेपालले दोस्रो खेल अक्टोबर २६ तारिख भारत र अन्तिम खेल अक्टोबर २८ मा पाकिस्तानसँग खेल्नेछ । समूहको शीर्ष टोली आगामी अप्रिलमा आयोजना हुने फाइनल चरणका लागि छनोट हुनेछ । उत्कृष्ट दुई उपविजेता टोलीले समेत फाइनलमा स्थान बनाउनेछन् । फाइनल चरणमा आठ टोलीबीच प्रतिस्पर्धा हुनेछ । च्याम्पियनसिपका लागि चीन, जापान र उत्तर कोरिया छनोट भइसकेका छन् ।
सरु लिम्बूको कप्तानीमा रहेको नेपाली टोलीमा २४ खेलाडी छन् । गोलरक्षकमा अञ्जना रानामगर, उषा नाथ र रविता राई छन् । रक्षकमा निशा थोकर, सुष्मा महर्जन, रोजिना श्रेष्ठ, समीक्षा घिमिरे, विमला विक, कोपिला धिमाल, पुनम फरसवान र पूजा रानामगर छन् । मिडफिल्डका कप्तान सरु लिम्बू, मञ्जलीकुमारी योञ्जन, सुभद्रा खड्का, अस्मिता वैद्य, मनीषा राउत, सुवानी कुस्वार, सिर्जनासिंह ठकुरी र सम्झना लावती छन् ।
यसैगरी स्ट्राइकरमा रश्मीकुमारी घिसिङ, रेखा पौडेल, एलिसा जिम्बा र सम्झना शर्मा छन् । हालै भुटानमा भएको यू–१८ साफ च्याम्पियनसिपको फाइनलमा पुगेको नेपाली टोलीले यस च्याम्पियनसिपमा छनोटको लक्ष्य राखेको टोलीका प्रशिक्षक हरिओम श्रेष्ठले बताए । दसैंअघि साफ खेलेको नेपाली टोलीले दसैंपछि तीन दिन मात्र तयारी गरेर थाइल्यान्ड गएको हो । टोलीको सहायक प्रशिक्षकमा श्रीप्रकाश वैद्य र गोलरक्षक प्रशिक्षकमा अस्मिता खवास रहेका छन् ।
प्रतिक्रिया दिनुहोस !
