काठमाडौं : ललितपुर शंखमूलको इलेभेन स्टार क्लबको आयोजनामा १०औं यल कप ब्याडमिन्टन प्रतियोगिता शनिबारदेखि हुने भएको छ। प्रतियोगिता कात्तिक १० देखि १७ गतेसम्म आफ्नै कोर्टमा सञ्चालन हुने क्लबका अध्यक्ष सानुकाजी महर्जनले जानकारी दिए।
रनिङ सिल्डका रूपमा रहेको प्रतियोगितामा पुरुष युगल, भेट्रान्स (४५ वर्षमाथि), मिक्स युगल र यू–१५ छात्र स्पर्धामा प्रतिस्पर्धा हुनेछ। प्रतियोगितामा करिब दुई सय खेलाडीको सहभागिता रहनेछ। करिब १२ लाख ६० हजार अनुमानित बजेट रहेको प्रतियोगितामा पुरुष युगलका विजेताले ३० हजार, दोस्रो हुनेले २० र तेस्रो स्थान हात पार्नेले १० हजार पुरस्कार पाउनेछन्। यस्तै भेट्रान्सका विजेताले क्रमशः १५ हजार, १० र पाँच तथा मिक्स युगल र यू–१५ का विजेताले १० हजार, सात हजार र चार हजार पुरस्कार पाउनेछन्।
ब्याडमिन्टन खेलको माध्यमबाट नगरभित्रका व्यक्तिहरूबीच भातृत्व, एकताका साथै स्वस्थ नागरिक र राष्ट्रिय खेलाडी उत्पादन गर्ने उद्देश्यले २०६५ सालदेखि आयोजना हुँदै आएको यस प्रतियोगिताले थुप्रै राष्ट्रिय तथा अन्तर्राष्ट्रिय खेलाडी उत्पादन गरिसकेको छ।
प्रतिक्रिया दिनुहोस !
