पोखरा : पोखरामा जारी पोखरा प्रिमियर लिग टीट्वेन्टी क्रिकेट प्रतियोगिताको आइतबारको पहिलो खेलमा एक्सपर्ट धनगढी विजयी भएको छ । सन्दीप लामिछानेको कप्तानीमा रहेको विराटनगर टिटान्सलाई ७८ रनले पराजित गर्दै दीपेन्द्रसिंह ऐरीको कप्तानीमा रहेको धनगढीले पहिलो जित निकालेको हो।
टस जितेर विराटनगरले फिल्डिङ रोजेपछि धनगढीले पहिले ब्याटिङ गरेको थियो । धनगढीले २० ओभरमा अलआउट हुँदै १८२ रन बनायो । १८३ रनको लक्ष्य पछ्याएको विराटनगर १६.४ ओभरमा १०४ रन बनाउँदा अल आउट भयो ।
विराटनगरका लागि सुनील धमलाले सर्वाधिक २१ रन बनाए । विराटनगरलाई अलआउट गर्ने क्रममा धनगढीका लागि इङ्ल्याण्डका खेलाडी डान लरेन्सले सर्वाधिक ३ विकेट र कप्तान दीपेन्द्रसिंह ऐरीले २ विकेट लिए।
पहिले ब्याटिङ गरेको धनगढीका लागि इङ्ल्याण्डका खेलाडी पिटर ट्रेगोले सर्वाधिक ५३ रन बनाए । कप्तान दीपेन्द्रसिंह ऐरीले २९ रन बनाउँदा नवौं नम्बरमा ब्याटिङ गर्न आएका सौरभ खनालले १३ बलमा ४१ रन बनाउँदै विस्फोटक ब्याटिङ गरे।
विराटनगरका लागि जिनेन्द्र मुखियाले धनगढीका ४ विकेट लिए । दुई खेलमा पोखरासँग पराजित भएको विराटनगरको यो दोस्रो हार हो । धनगढी पनि पहिलो खेलमा शनिबार काठमाडौंसँग पराजित भएको थियो ।
आइतबारको दोस्रो खेलमा पोखरा र बुटवल प्रतिस्पर्धा गर्दैछन् ।
प्रतिक्रिया दिनुहोस !
