काठमाडौं : नेपालमा आयोजना हुन लागेको १३औं दक्षिण एसियाली खेलकुद (साग) आगामी सेप्टेम्बरमा हुने भएको छ । आइतबार बसेको तयारी तथा व्यवस्थापन समितिको बैठकले सन् २०१९ को सेप्टेम्बर र अक्टोबरमा प्रतियोगिता आयोजना गर्ने निर्णय गरेको हो ।
युवा तथा खेलकुदमन्त्री जगतबहादुर सुनार (विश्वकर्मा) को अध्यक्षतामा बसेको बैठकले प्रतियोगिताको नयाँ मिति तय गरेको हो । यसअघि आगामी मार्चका लागि मिति तय भएको थियो । २०७२ सालको भूकम्पले क्षति पुगेका संरचनाको मर्मतसम्भार गर्न अझै केही महिना लाग्ने भएकाले प्रतियोगिताको मिति ६ महिना पर सार्ने निर्णय गरिएको मन्त्री विश्वकर्माले जानकारी दिए ।
काठमाडौं, ललितपुर, पोखरा र कीर्तिपुर गरी चार सहरमा आयोजना हुने प्रतियोगितामा २७ खेल प्रस्तावित गरिएको छ । हक्कीलाई भने वैकल्पिक खेलमा राखिएको छ । बैठकले विभिन्न ६ उपसमिति पनि गठन गरेको सदस्य विनोद श्रेष्ठले जानकारी दिए ।
‘आइतबार बसेको बैठकले १३औं सागको नयाँ मिति निर्धारण गरेको भने विभिन्न ६ उपसमिति पनि गठन गरिएको छ’ श्रेष्ठले भने । बैठकले विनोद श्रेष्ठको संयोजकत्वमा स्वयम्सेवक, शिव कोइरालाको संयोजकत्वमा यातायात, तेज गुरुङको संयोजकत्वमा आवास, टासी घलेको संयोजकत्वमा खेल स्थल व्यवस्थापन, विज्ञानराज शर्माको संयोजकत्वमा सुरक्षा र पोखरा महानगरपालिका मेयर मानबहादुर जीसीको संयोजकत्वमा स्थानीय परिचालन उपसमिति गठन गरिएको छ ।
प्रतिक्रिया दिनुहोस !
