बार्सिलोना : स्पेनिस फुटबलका दुई महारथीबीच आइतबार राति भएको ‘एल क्लासिको’ भिडन्तमा बार्सिलोनासामु रियल म्याड्रिड निरीह देखिएको छ । आफ्नै घरेलु मैदान क्याम्प नोउमा खेलिएको उक्त खेलमा बार्सिलोनाले रियललाई ५—१ गोलको फराकिलो अन्तरले हरायो । जितसँगै साबिक विजेता बार्सिलोना पुनः अंकतालिकाको पहिलो स्थानमा फर्किएको छ ।
करिब आठ वर्षपछि पहिलो पटक दुई चर्चित खेलाडी लियोनल मेसी र क्रिस्टियानो रोनाल्डोको अनुपस्थितिमा ‘एल क्लासिको’ भिडन्त भएको हो । बार्सिलोनाका मेसी हात भाँचिएका कारण मैदानबाहिर रहेका हुन् भने रियलमा लामो समय बिताएर रोनाल्डो यसै सिजन इटालियन क्लब युभेन्ट्समा आबद्ध भएका छन् । बार्सिलोनाको जितमा उरुग्वेका अनुभवी खेलाडी लुइस स्वारेज नायक बने ।
स्वारेजले ह्याट्रिक गरेपछि बार्सिलोनाको सहज जित सम्भव भएको थियो । खेल सुरु भएको ११औं मिनेटमै फिलिप कोउटिन्होले बार्सिलोनालाई अग्रता दिलाएका थिए । ३०औं मिनेटमा स्वारेजले पेनाल्टीमार्फत गोल गर्दै टोलीको अग्रता दोब्बर बनाए । राफेल भारानेले डी बक्सभित्र स्वारेजलाई फल गरेपछि भिडियो असिस्टेन्ट रेफ्रीको माध्यमबाट बार्सिलोनाले पेनाल्टी प्रहारको अवसर पाएको थियो । ‘एल क्लासिको’ भिडन्तमा पहिलो पटक भिडियो असिस्टेन्ट रेफ्रीको प्रयोग गरिएको हो ।
यसैगरी ५०औं मिनेटमा मार्सेलोले रियलका लागि जवाफी गोल फर्काएका थिए । मार्सेलोले रियलका लागि लगातार तेस्रो खेलमा गोल गरेका हुन् । ३१ वर्षीय स्वारेजले ७५औं मिनेटमा बार्सिलोनालाई ३—१ को अग्रता दिलाए । ८३औं मिनेटमा स्वारेजले ह्याट्रिक पूरा गरेपछि बार्सिलोना ४—१ ले अगाडि बढेको थियो । सन् २०१४÷१५ सिजनमा बार्सिलोनामा आबद्ध भएयता स्वारेजले रियलविरुद्घ ला लिगामा गरेको गोल संख्या नौ पुगेको छ । अत्यन्तै फितलो प्रदर्शन गरेको रियलले निर्धारित समयको खेल सकिनुभन्दा तीन मिनेटअघि पाँचौं गोल खाएको थियो । बार्सिलोनाका लागि अन्तिम गोल आर्टुरो भिदालले गरेका थिए ।
रियलका गोलरक्षक थिबाउट कोर्टियसले ला लिगामा हालसम्म बार्सिलोनासँग १९ गोल खाइसकेका छन् । उनले यति गोल अन्य कुनै टोलीविरुद्घ खाएका छैनन् ।
सहभागी सबै टोलीले १०÷१० खेल खेलिसक्दा २१ अंकसहित बार्सिलोना पहिलो स्थानमा छ । २० अंकसहित डेपोर्टिभो आल्भेस दोस्रो, १९ अंकसहित सेभिल तेस्रो र समान अंक बटुलेको एट्लेटिको म्याड्रिड चौथो स्थानमा छन् । जारी सिजनमा एकपछि अर्को निराशाजनक प्रदर्शन दोहोर्याउँदै आएको रियल भने १४ अंकसहित तालिकाको नवौं स्थानमा झरेको छ।
सन् १९९४ पछि ‘एल क्लासिको’ मा ह्याट्रिक गर्ने स्वारेज बार्सिलोनाका दोस्रो खेलाडी हुन् । सन् १९९४ मा भने रोमारियोले ह्याट्रिक गरेका थिए । सन् २००६ को अप्रिलयता बार्सिलोनाका लागि ‘एल क्लासिको’ मा पेनाल्टीमार्फत गोल गर्ने पनि स्वारेज मेसीपछिका दोस्रो खेलाडी हुन् । सन् २००६ को अप्रिलमा बार्सिलोनाका लागि ब्राजिलियन खेलाडी रोनाल्डिन्होले पेनाल्टीमार्फत गोल गरेका थिए ।
यसैगरी रियलले सन् २०१० को नोभेम्बरयता कुनै पनि प्रतियोगितामा पाँच गोल खाएको यो पहिलो पटक हो । सन् २०१० को नोभेम्बर २९ तारिखमा खेलिएको ला लिगामा बार्सिलोनाले रियललाई आफ्नै मैदानमा ५—० गोलले हराएको थियो । यी दुई क्लबबीच हालसम्म खेलिएका खेलमा भने सबैभन्दा ठूलो अन्तरको हार÷जित ११—१ गोलले भएको छ । सन् १९४३ को जुन १९ तारिखमा कोपा डेल रेअन्तर्गत भएको खेलमा रियलले घरेलु मैदानमा बार्सिलोनालाई ११—१ ले हराएको थियो ।
बार्सिलोना आफ्नो घरेलु मैदानमा खेलिएको पछिल्ला ४२ लिग खेलमा अपराजित छ । यसबीचमा घरेलु मैदानमा बार्सिलोनाले ३४ जित र आठ बराबरीको नतिजा निकालेको छ । सन् १९७७ को फेब्रुअरीयता बार्सिलोनाको यो सबैभन्दा लामो अपराजित यात्रा हो । सन् १९७७ मा बार्सिलोना घरेलु मैदानमा खेलिएको ला लिगामा ६७ खेलसम्म अपराजित रहेको थियो ।
स्पेनिस ला लिगामा बार्सिलोनाले रियलविरुद्घ खेलिएका पछिल्ला २२ खेलमा कम्तीमा एक गोल गर्दै आएको छ । यसअघि सन् १९५९ र सन् १९६९ मा रियलले पनि बार्सिलोनाविरुद्घ लगातार २२ खेलमा गोल गरेर ‘एल क्लासिको’ मा कीर्तिमान बनाएको थियो । रियलले ला लिगाको पछिल्ला पाँच खेलमा जित हात पार्न सकेको छैन । यसबीचमा रियलले एक बराबरी र चार हारको नतिजा निकालेको छ । सन् २००९ को मेयता रियलको यो सबैभन्दा खराब प्रदर्शन हो । त्यतिबेला रियल लगातार पाँच खेलमा पराजित भएको थियो ।
प्रतिक्रिया दिनुहोस !
