कास्की : कास्कीको माछापुच्छ्रे गाउँपालिका-८ मा एक वृद्धा घरभित्र मृत अवस्थामा फेला परेकी छिन्। नयाँपुलकी ८० वर्षीया कौशिला गुरुङको शव सोमबार साँझ घरभित्र शंकास्पद अवस्थामा भेटिएको जिल्ला प्रहरी कार्यालय कास्कीका प्रहरी नायब उपरीक्षक रवीन्द्रमान गुरुङले जानकारी दिए ।
मृतकको टाउकोलगायत शरीरका विभिन्न भागमा चोट देखिएको र घरको मूल ढोकामा बाहिरबाट ताल्चा लगाइएकाले घटनाको प्रकृति हेर्दा उनको हत्या भएको आशङ्का हुनसक्ने प्रहरी नायब उपरीक्षक गुरुङले बताए।
आइतबार राति भएको घटनाका बारेमा सोमबार साँझमात्र जानकारी भएको थियो। कौशिला जेठा छोरा चित्रबहादुरसँग बस्दै आएकी थिइन् । छोरा घरमा नभएको दिन उक्त घटना घटेको सोही वडाका वडाध्यक्ष कृष्णप्रसाद दवाडीले बताए। साथमा भएका गरगहना लुट्ने नियतले गुरूङको हत्या भएको हुनसक्ने प्रारम्भिक आँकलन प्रहरीको छ।
मृतकको शव पोष्टमार्टमको लागि पश्चिमाञ्चल स्वास्थ्य विज्ञान प्रतिष्ठानमा लगिएको र घटनाको अनुसन्धान भइरहेको प्रहरीले जनाएको छ । रासस
प्रतिक्रिया दिनुहोस !
