गोरखा : गोरखा र धादिङको सिमानामा बन्न लागेको बूढीगण्डकी जलविद्युत् आयोजनाको डुबान क्षेत्र वरिपरि चक्रपथ निर्माणको प्रक्रिया सुरु भएको छ । आयोजनाका मुआब्जा वितरण तथा पुर्नवास तथा पुनःस्थापना एकाइका प्रमुख कृष्णबहादुर कार्कीले आयोजना बाहिर रिङरोड निर्माण गर्ने योजनाअन्तर्गत १०० किलोमिटर सडक निर्माण प्रक्रिया सुरु गर्न लागेको बताए।
आयोजनाको वरपर चक्रपथ निर्माणका लागि आयोजनाले विस्तृत आयोजना प्रतिवेदन (डिपिआर) तयार पारिसकेको आयोजना प्रमुख कार्कीले जानकारी दिए। उनले आउँदो पुसदेखि सडक निर्माणका लागि ठेक्का प्रक्रिया सुरु हुने बताए। 'डिपिआर तयार भइसकेको छ, केही प्रक्रिया मिलाउन बाँकी रहेकाले ढिलाइ भएको हो, आउँदो पुसदेखि ठेक्का प्रक्रिया सुरु हुन्छ', उनले भने।
प्रमुख कार्कीले गोरखातर्फ घ्याल्चोकको सिउरेनीटारबाट बोर्लाङको महादेवटारसम्मको १०० किलोमिटर सडकको डिपिआर बनाइएको जानकारी दिए। त्यस्तै धादिङतर्फ पनि चालु आवमा १०० किलोमिटर सडकको ट्र्याक खोल्ने तयारी रहेको उनले बताए । कार्कीकाअनुसार अब गोरखातर्फ ६० र धादिङतर्फ २५ किमी सडकको डिपिआर बनाउन बाँकी छ। सडक निर्माणका लागि यो आर्थिक वर्ष सरकारले १२ करोड रुपैयाँ छुट्याएको छ। दुवै जिल्लामा ६/६ करोड खर्च गरेर ट्र्याक निर्माण अघि बढाउन लागिएको हो ।
राष्ट्रिय गौरवको आयोजनाको रूपमा रहेको बूढीगण्डकी आयोजनाको जलाशय करिब ५४ किमी फराकिलो हुनेछ। आयोजनाले चक्रपथ वरपर ३०० किलोमिटर रिङरोड बनाउने गरी डिपिआर तयार पारेको छ ।
प्रतिक्रिया दिनुहोस !
