काठमाडौं : नेपाल यू–१५ साफ च्याम्पियनसिप फुटबलको सेमिफाइनलमा पराजित भएको छ । एन्फा मैदान सातदोबाटोमा बिहीबार भएको खेलमा नेपाल पाकिस्तानसँग ४–० गोलले पराजित भयो । आन्तरिक कलहका कारण तीन वर्ष विश्व फुटबल महासंघ (फिफा) को प्रतिबन्धमा रहेको पाकिस्तानको यो प्रतिबन्ध फुकुवापछिको पहिलो अन्तर्राष्ट्रिय प्रतियोगिता हो । उमेरसमूहको खेलमा उत्कृष्ट प्रदर्शन गरिरहेको पाकिस्तान यही प्रतियोगितामार्फत फुटबलमा खुसी फर्काउने अभियानमा देखिएको छ ।
पहिलो हाफमा गोलरहित बराबरीमा रोकिएको नेपाल दोस्रो हाफको सुरुआतमै आत्मघाती गोलको सिकार भएको थियो । शारीरिक रूपले बलियो देखिएको पाकिस्तानले खेलको सुरुआतदेखि नै नेपालमाथि आक्रमण जारी राखेको थियो ।
५४औं मिनेटमा पाकिस्तानको प्रहारलाई रोक्ने क्रममा नेपालका जान लिम्बूको प्रहार आत्मघाती गोलमा परिणत भएपछि नेपाल दबाबमा देखिएको थियो । लगत्तै ६०औं मिनेटमा जान लिम्बूले पाकिस्तानका ओसामालाई डीबक्सभित्र फल हानेपछि पाकिस्तानले पेनाल्टीको मौका पाएको थियो । जान रातोकार्ड पाउँदै बाहिरिएपछि १० खेलाडीमा समेटिएको नेपाल थप कमजोर बन्यो । उक्त पेनाल्टीलाई पाकिस्तानका मोहिव उल्लाहले सदुपयोग गरे ।
पाकिस्तानले त्यसलगत्तै अर्को पेनाल्टीको मौका पायो । नेपालका रोजित परियारले पाकिस्तानका इफ्तिकहार अहमेदलाई डीबक्सभित्र लडाएपछि पाकिस्तानले दोस्रो पेनाल्टीको अवसर पाएको थियो । उक्त पेनाल्टी प्रहारमा मोहिब नै सफल बने । पाकिस्तानले ७७औं मिनेटमा चौथो गोल थपेको थियो । पाकिस्तानका मोइन अहमेदले उत्कृष्ट हेड गोल गर्दै टोलीको जित सहज बनाएका थिए । दोस्रो हाफमा कमजोर देखिएको नेपालले पहिलो हाफमा एउटा उत्कृष्ट अवसर खेर फालेको थियो । नेपालका मनग्य नकर्मी पोस्ट नजिक वान भर्सेस वानको अवस्थामा चुकेका थिए ।
फाइनलमा पाकिस्तानले बंगलादेशसँग खेल्नेछ । बिहीबार नै भएको पहिलो सेमिफाइनल खेलमा बंगलादेशले भारतलाई टाइब्रेकरमा ४–२ गोलले हराउँदै फाइनलमा स्थान बनाएको हो । निर्धारित समयको खेल १–१ गोलमा सकिएपछि खेल सोझै टाइब्रेकरमा गएको थियो ।
प्रतिक्रिया दिनुहोस !
