बेसीशहर : सरकारले सार्वजनिक गरेको देशभरका पर्यटकीय गन्तव्यको सूचीमा लमजुङको घलेगाउँ र काउलेपानी होमस्टे पनि परेका छन् ।
संस्कृति, पर्यटन तथा नागरिक उड्डयन मन्त्रालयले प्राकृतिक, पूरातात्विक, ऐतिहासिक सांस्कृतिक तथा धार्मिक दृष्टिका आधारमा देशभरबाट नयाँ एक सय पर्यटकीय गन्तव्य छनोट गर्दा लमजुङका दुई गाउँ परे ।
सरकारले स्थापित तथा प्रवद्र्धन गर्नुपर्ने र नयाँ तथा विकास गर्नुपर्ने गरेर करिब दुई सय गन्तव्य पहिचान गरेको छ । जसमध्ये नयाँ गन्तव्यमात्र एक सय छन् ।
मन्त्रालयले नयाँ पर्यटकीय गन्तव्यको विकासका लागि चालु आर्थिक वर्षमा विनियोजित बजेटबाट रकम बाँडफाँड हुने बताइएको छ । सरकारले छानेका स्थापित तथा प्रवद्र्धन गर्नुपर्ने स्थानमा सार्क राष्ट्रको नमूना घलेगाउँ र नयाँ तथा विकास गर्नुपर्ने स्थानमा नेपालकै नमूना होमस्टे काउलेपानीलाई छनोट गरेको हो ।
घलेगाउँ :
हिमालै हिमालको काखमा रहेको करिब छ सय वर्ष पुरानो घलेगाउँमा हिमाली दृष्यावलोकन, सुधारिएको होमस्टेसँगै परम्परागत गुरुङ संस्कृति झल्कने घाँटु, सोरठी, सेर्गा, कृष्णचरित्रलगायत नृत्य, नमुना चिया बगानको अवलोकन, गुरुङ खाना, सूर्योदय र सूर्यास्तको दृष्यावलोकन गर्न सकिन्छ । यस्तै सामूहिक भेडापालनको अवलोकन, बोटानिकल गार्डेन र भ्यू टावर आदि घलेगाउँका आकर्षणहरु हुन ।
सुरुमा १३ घरबाट सुरु भएको घलेगाउँको होमस्टे अहिले ३५ घरमा विस्तार भएको छ । दक्षिण एसियाकै नमुना गाउँका रूपमा विकास भएको घलेगाउँमा पर्यटकको आगमनसँगै स्थानीय बासिन्दाको आर्थिकस्तर पनि उकासिँदै गएको छ ।
लमजुङको बेसीसहरबाट मोटरमा दुई घण्टामा घलेगाउँ पुग्न सकिने भएपछि हाल आन्तरिक पर्यटकको आगमनमा निकै बृद्धि भएको हो । दैनिक दुईसय भन्दा बढी आन्तरिक पर्यटक आउने गरेको पर्यटन व्यवस्थापन समिति ग्रामिण पर्यटन घलेगाउँका अध्यक्ष प्रेम घलेले बताए । ‘घलेगाउँमा बार्षिक ३० हजार बढी पर्यटक आउने गरेका छन’, घलेले भने, ‘पर्यटकबाट मात्रै गाउँमा करोड बढी रकम भित्रिएको छ । गाउँमै कृषि उपजको विक्री र रोजगारीको अबसर समेत खुलेको छ ।’
समुद्री सतहबाट २ हजार १ सय मिटर उचाइमा रहेको घलेगाउँबाट लमजुङ हिमाल, मनासुलु, माछापुच्छ«े, अन्नपूर्ण, हिमालचुली लगायतका हिमाल नजिकबाट नियाल्न सकिन्छ भने मस्र्याङदी, खुदी, मादी लगायतका नदीको मनोरम दृष्य देख्न सकिन्छ । पाहुनाहरुको न्यानो सत्कार गरिने घलेगाउँ पुग्ने पर्यटकलाई दही चामलको अक्षता र फूलमालाले स्वागत गर्दै दुलही झै भित्राउने चलन छ ।
काउलेपानी :
गाउँ पर्यटन प्रवद्र्धन मञ्च (भिटोफ) ले नेपालकै उत्कृष्ट होमस्टे गाउँ घोषणा गरेपछि काउलेपानी होमस्टेमा आन्तरिक पर्यटकको चाप बढेको छ । लमजुङको सदरमुकाम बेसीशहरबाट मोटरमा करिब ७ किलोमीटर कच्ची बाटो पार गर्दै पुगिने गाउँशहरको काउलेपानी गाउँ समुन्द्री सतहदेखि १ हजार ६ सय मिटर उचाइमा छ । काउलेपानीबाट बुद्ध, मनास्लु, अन्नपूर्ण, लमजुङ लगायत १४ वटा हिमश्रृङ्खला देख्न सकिन्छ ।
लमजुङ दरबार, काउलेपानी देवी मन्दिर लगायत ऐतिहासिक महत्व बोकेको काउलेपानी क्षेत्रमा गुरुङ, नेवार, भुजेल लगायतका जातजातिको बसोबास छ । काउलेपानीको होमस्टेसँगै स्थानीयवासिन्दाको कला, संस्कार र संस्कृतिले काउलेपानी पर्यटकीय गन्तब्यको रुपमा विकसित हुँदै गएको होमस्टे व्यवस्थापन समितिका अध्यक्ष देउबहादुर गुरुङले बताए ।
काउलेपानीलाई पर्यटकीय गन्तब्यको रुपमा विकास गर्न शीरखोला आमा समूह पनि उत्तिकै लागि परेको छ । गाउँमा आउने पर्यटकलाई आमा समूहकै नेतृत्वमा स्वागत सत्कार गर्ने गरिएको छ । गुरुङ, नेवार र भुजेल जाति गरी २७ घरधुरी रहेको उक्त गाउँका १२ घरमा होमस्टेको व्यवस्था मिलाइएको छ ।
काउलेपानी पुगेपछि आर्गानिक अन्नको साथमा लोकल कुखुरा, गुन्द्रुकको अचार, सिस्नुको खोले, कोदाको रोटी, दूध, दही अनि लोकल रक्सी खान पाइन्छ । भव्य स्वागत सत्कारसहित बेलुकाको खाजा, खाना, क्याम्प फायरसहितको सांस्कृतिक कार्यक्रम, सुत्ने र बिहानको नास्तासहित एक हजारमा काउलेपानीसँग साइनो जोड्न सकिन्छ । त्यहाँ पुग्ने पर्यटकले शिरखोला आमा समूहको भब्य स्वागत सत्कार र विदाई समेत पाउने गरेका छन् ।
यसबाहेक सिउरुङ, तुर्लुङकोट, राईनासकोट, नरुवल, खासुर लगायत गाउँलाई पर्यटकीय गन्तव्यमा छुटाइएको भन्दै स्थानीय अगुवाले गुनासो गर्दै आएका छन् । यसबारे उनीहरुले सम्बन्धित निकायसँग ध्यानाकर्षण गराउने बताएका छन् ।
प्रतिक्रिया दिनुहोस !
