वासिङटन : अफगानी एक पाइलटले अफगानिस्तानमा एक अमेरिकी सैनिक कमान्डर मारिएपछि उनकी श्रीमति र सात सन्तानलाई सम्बोधन गर्दै भावुक पत्र पठाएका छन् ।
मेजर ब्रेन्ट टेलर नाम गरेका अमेरिकी सैनिक अधिकारी अफगानिस्तानमा त्यहाँ कमान्डो तालिम दिने क्रममा गत साता आन्तरिक हमलामा मारिएका थिए । ३९ वर्षे टेलर गत शनिबार काबुलमा हतियारधारी समूहको हमलामा मारिएका थिए ।
यस घटनापछि अफगानी पाइलट मेजर अब्दुल रहमान रहमानीले ती अमेरिकी अधिकारीकी श्रीमति र सात जना सन्तानलाई सम्बोधन गर्दै चिठी पठाएका हुन् । जब कि, पाइलट मेजरले टेलरलाई दुई फरक मिसनमा उँडाइसकेका थिए ।
‘तिम्रो पतिको मृत्युमा अधिकांश अफगानीहरुले गहिरो दुख र चरम पीडा महसुश गरेको जानकारी गराउन चाहन्छु,’ पाइलट रहमानीले लेखेका छन्, ‘जब तिमी हाम्रो देश र उनको वलिदानीको बारेमा सोच्छौ, म तिम्रो दुख अथवा पति गुमाउनुको पीडा सोच्न पनि सक्दिन । तर कृपया हिंसात्मक घटनाले तिम्रा पतिको ज्यान लिएको कुरालाई हाम्रो प्रतिनिधि घटना वा अमेरिकीहरुबारे हामी अफगानीहरुको धारणाको रुपमा नलिइदेउ !’
पत्रमा अफगान मेजरले ३० वर्षको अवधिमा आफ्नो परिवारका ८ सदस्य गुमाउनु परेको पनि स्मरण गराएका छन् । सैनिक जासुस टेलरले भने आगामी जनवरीमै मिसन सकेर आफ्नी श्रीमति र सन्तानको साथ फर्कने अपेक्षा गरेका थिए ।
रहमानीले टेलरकी पत्नि जेन्नीलाई सार्वजनिक रुपमै पत्र लेखेपछि उक्त पत्र टेलरका ज्वाईँले जेन्नीसमक्ष पुर्याइदिएका थिए । हाल अफगानिस्तानमा ‘नाटो’ सहयोगार्थ १४ हजार अमेरिकी सेना अफगानी सैनिकलाई तालिम दिन तैनाथ छन् ।
प्रतिक्रिया दिनुहोस !
