पोर्चुगलमा नेपाली सवार ट्याक्टर पल्टियो, एकको अवस्था चिन्ताजनक
कात्तिक २२, २०७५ बिहीबार १८:४७:०
लिस्बन : पोर्चुगलको एक कृषि फार्मको ट्याक्टर पल्टिँदा दर्जन भन्दा धेरै नेपाली घाइते भएका छन् । यो घटनामा परेका एकजना नेपालीको अवस्था चिन्ताजनक छ ।
५० जना भन्दा धेरै कृषि मजदुर कोचाकोच चढेको ट्याक्टर सोमबार पल्टिँदा अचेत भएका एक नेपालीको स्थानीय अस्पतालको आईसीयूमा उपचार भइरहेको छ ।
यो दुर्घटनामा दाङ घर भइ हाल पोर्चुगलको कम्पोर्टास्थित अलेन्तेजु, बेजामा बस्दै आएका लोकेन्द्रबहादुर पुन मगर गम्भीर घाइते भएका छन् । उनको चिन्ताजनक अवस्थामा अस्पतालमा उपचार भइरहेको छ ।
साथीहरुसँगै काममा जाने क्रममा उनी दुर्घटनामा परेका थिए । दुर्घटनापछि उनको शरीरमा गहिरो चोट लागेको छ । हड्डी भाँचिएको भागमा स्टिल रड राखेर उपचार गरिएको छ। अन्य घाइतेहरु भने उपचारपछि काममा फर्किएका छन् ।
घाइते पुनमगरको अहिले सान्टिआगोस्थिट स्थानीय अस्पताल बेजामा उपचार भइरहेको छ । घटना सार्वजनिक भएपछि एनआरएनए पोर्चुगलका वरिष्ठ उपाध्यक्ष तिलक गैरे नेतृत्वको टोली अस्पताल पुगेको छ । जहाँ पुन मगर अहिले पनि अचेत अवस्थामा रहेका छन् ।
प्रतिक्रिया दिनुहोस !
