मुन्द्रेको ‘कमेडी क्लब’ युट्युबमा नम्बर १ ट्रेन्डिङ
काठमाडौँ : नेपाल टेलिभिजनमा सोमबारदेखि प्रसारणमा भएको हाँस्य कलाकार जीतु नेपाल ‘मुन्द्रे’को ‘कमेडी क्लब’ युट्युबमा नम्बर १ ट्रेन्डिङ भएको छ । हरेक साता सोमबार राति ८ बजेर ५० मिनेटमा प्रसार हुने उक्त कमेडी शोको पहिलो भाग तीन दिन नबित्दै ट्रेन्डिङको नम्बर १ मा आइपुगेको हो ।
सोमबार राति लाइभ कार्यक्रम सकिएपछि युट्युबमा अपलोड गरिएएको कमेडी क्लबको पहिलो भाग हालसम्म ५ लाख ६० हजारले हेरिसकेका छन् ।
विदेशी कमेडी शो (खासगरी भारतीय) मा बानी परेका नेपालीका लागि यो कार्यक्रम नयाँ र स्वादिलो खुराका भएको प्रतिक्रिया कार्यक्रम सञ्चालक जितु नेपालले दिएका छन् । मुन्द्रे उपनामले हाँस्य कलाकारिताको क्षेत्रमा चिनिने जितुले यसअघि नेपाल टेलिभिजनमा प्रसाररण हुने ‘जिरे खुर्सानी’ को निर्देशन समेत गरेका थिए ।
कमेडी क्लबको पहिलो भागमा सफल चलचित्र छक्का पञ्जा–३ का नायक तथा निर्माता दीपकराज गिरीलाई अतिथिका रुपमा ल्याइएको थियो । कमेडी क्लबको अध्यक्षको भूमिकामा भने छक्का पञ्जा–३ की निर्देशक दीपाश्री निरौला रहेकी छन् ।
यो क्लबमा हाँस्य कलाकारहरु राजाराम पौडेल, राजेन्द्र नेपाली र उमेश राईलाई पनि देख्न सकिने छ । कमेडी क्लबको दोस्रो भागमा अर्का चर्चित हाँस्य कलाकार केदार घिमिरे ‘माग्ने बुढा’लार्इ अतिथिकारुपमा ल्याइने भएको छ ।
कमेडी क्लबको पहिलो भाग