अफगानिस्तानमा युद्ध अन्त्यबारे छलफलमा तालिवानीसँगै भारतीय प्रतिनिधि पनि

मस्काे : तालिवानी समूहसँग सन् २००१ देखि गरिएका वार्ताको पूर्नमुल्यांकन गर्ने विषयमा आयोजित एक शान्ति सम्मेलनमा भारतले पनि सहभागिता जनाएको छ ।

रसियाले आयोजना गरेको यस सम्मेलनमा अफगानिस्तान र पाकिस्तानका लागि भारतीय पूर्व राजदूत अमर सिन्हा सहभागी भएका हुन् । भारतका विदेशमन्त्रालयका प्रवक्ता रविश कुमारले भने, ‘शान्तिका लागि हुने सबै प्रयासमा भारतले सहयोग गर्छ । जसले मुलुकमा स्थायित्व, सुरक्षा र समृद्धि निम्त्याउने छ ।’

यही शुक्रबार मस्कोमा भएको यस सम्मेलनमा अमेरिका, इरान, चीन, पाकिस्तान लगायत मुलुकका प्रतिनिधि बोलाइएको थियो । कतारको राजनीतिक आयोगका प्रमुख मोहम्मद अब्बास स्टानाक्जाइको नेतृत्वमा रहेको तालिवानी तर्फबाट समेत पाँच जना प्रतिनिधि सम्मेलनमा सहभागी थिए ।

सम्मेलनको क्रममा अफगानिस्तानमा जारी युद्ध अन्त्यको लागि पहल गर्ने बारे पनि बहस भएको थियो । जहाँ भारतीय प्रतिनिधि पनि तालिवान प्रतिनिधिसँगै सहभागी भएका हुन् ।

तालिवानी समूह सम्मिलित कुनै पनि औपचारिक सम्मेलनमा भारतले यसअघि कहिल्यै आफ्नो प्रतिनिधि पठाएको थिएन । रसियाको आयोजनामा भएको शुक्रबारको सम्मेलनमा भारतीय प्रतिनिधि सहभागी हुनुलाई महत्वका साथ हेरिएको छ ।