वासिङटन : नेपालमा हिन्दु धर्मावलम्वीले विशेष चाडको रुपमा मनाउने दिपावलीलाई भारतमा त्यस्तै वा केही फरक तरिकाले मनाइन्छ ।
भारतमा यसलाई दिवाली भनिन्छ । भारतका हिन्दु धर्मावलम्वीको महान पर्वको रुपमा मनाइने दिवालीलाई नयाँ वर्षको सुरुवात पनि मानिन्छ । नेपालका हिन्दुले मनाउने दिपावली र भारतमा मनाइने दिवालीका केही भिन्नता भए पनि मूलतः उस्तै चाड हो ।
त्यसो त, नेपालकै मधेस मूलमा दिपावलीलाई दिवाली पनि भनिन्छ । यही पर्वलाई अमेरिकी राष्ट्रपति डोनाल्ड ट्रम्प (जो ईशाई धर्मावलम्वी हुन्)ले पनि राष्ट्रपति कार्यालय ह्वाइट हाउसमा धुमधाम साथ मनाए । उनले आफ्नो ट्वीटरमा समेत दिवाली मनाउँदै गरेको तस्बिर नै सार्वजनिक गरेका छन् ।
तर हिन्दुलाई बोलाइएन !
धर्ममा कट्टर नै मानिने अमेरिकी राष्ट्रपति ट्रम्पले हिन्दु पर्व दिवाली त मनाए, तर त्यहाँ हिन्दु धर्मावलम्वीलाई नबोलाइएको बुझिएको छ । ट्रम्पले ट्वीटरमा बुद्धिष्ट, सिख, जैन धर्मावलम्वीको उपस्थितिमा ह्वाइट हाउसमा दिवाली मनाएको उल्लेख गरेका छन् ।
उनले लेखेका छन्, ‘आज हामीले दिवाली मनायौँ । अमेरिका र विश्वभर रहेका बुद्धिष्ट, सिख र जैन धर्मावलम्वीले यो पर्व अवलोकन गरे । लाखौं जनता आफ्नो परिवार र साथीसहित बत्ती बाल्न र नयाँ वर्षको सुरुवात गर्न भेला भएका छन् ।’
ट्रम्पले के हिन्दु धर्मावलम्वीलाई दिवालीमै नबोलाएका हुन् वा ट्वीटरमा उल्लेख गर्दा त्रुटी भएको भन्नेमा भने प्रष्ट छैन । अहिले उनको ट्वीटरको अभिव्यक्तिलाई लिएर थुप्रै टिप्पणी भएको छ । धेरैले ‘हिन्दुलाई चाहीँ किन बोलाइएन ?’ भन्दै सोधेका छन् । जब कि, बुद्धिष्ट धर्मावलम्वीले दवाली मनाउने चलन छैन । ट्रम्पले आफ्नो अघिल्लो ट्वीटमा भने ‘हिन्दुको पर्व दिवाली’ भनेर उल्लेख गरेका थिए ।
प्रतिक्रिया दिनुहोस !
