कालिकोट : नेपाली कांग्रेसको भ्रातृ संगठन नेपाल महिला संघ केन्द्रीय महासचिव धना खतिवडाले वर्तमान सरकारको गतिविधिप्रति आक्रोश व्यक्त गरेकी छन् ।
राष्ट्रियसभा सदस्य समेत रहेकी खतिवडाले शुक्रबार पार्टीको अगुवा कार्यकर्ता भेला तथा अन्तरक्रियालाई सम्बोधन गर्दै भनिन्, ‘अब कांग्रेसले स्थानीय तहदेखि केन्द्रसम्मै सशक्त प्रतिपक्षको भुमिका खेल्ने छ ।’
सरकारका कामप्रति आफूहरु असन्तुष्ट रहेको भन्दै कांग्रेस अब चुप लागेर नबस्ने उनको भनाइ छ । अपराधीलाई कारवाही गर्न असफल भएको भन्दै सरकारप्रति उनी आक्रोशित बनेकी थिइन् । कन्चनपुरकी बालिका निर्मला पन्तका बलात्कारी तथा हत्यारालाई कारवाही गर्न सरकार असफल भएको बताउँदै यसमा सरकार जिम्मेवार बन्न नसकेको बताइन् ।
साथै सरकारले मुलुकमा अपराध र दण्डहिनता बढ्दा पनि केही गर्न नसकेको उनको गुनासो थियो । न्यायको लागि नागरिक उठ्दा पनि सरकार उनीहरुलाई दमन गर्न लागेकोले अब आफ्नो पार्टी कांग्रेस चुप लागेर नबस्ने चेतावनी दिइन् ।
यसबाहेक प्रधानमन्त्री केपी शर्मा ओलीले उठाउँदै आएको समृद्धको नारालाई नेतृ खतिवडाले ‘जनताको आँखामा छारो’को संज्ञा दिएकी छन् । उनले भनिन्, ‘दुई तिहाई बहुमतको सरकारले मुलुकको विकास निर्माण र जनजीविकाका सवालमा ठोस कदम चाल्नुको साटो दुई तिहाइको दम्भ देखाएर नागरिकमाथि दमन गर्दै आएको छ ।’
प्रतिक्रिया दिनुहोस !
