‘प्रधानमन्त्रीमा शक्तिको उन्माद, जंगबहादुर र हिटलर जस्तै बन्न खोजे’

काठमाडौं : प्रमुख प्रतिपक्षी दल नेपाली कांग्रेसका नेता एवम् पूर्वमन्त्री अर्जुननरसिंह केसीले वर्तमान प्रधानमन्त्री केपी शर्मा ओली जंगबहादुर, स्टालिन र हिटलर बन्ने प्रवृत्तितर्फ उन्मुख रहेको गम्भिर आरोप लगाएका छन् । 

‘प्रधानमन्त्रीले काम भन्दा बढी कुरा गर्नुभयो । उहाँ आफूमा शक्ति केन्द्रित गर्न उद्धत हुनुहुन्छ । उहाँमा सत्ता र शक्तिको उन्माद देखियो’ केसीले भने, ‘प्रधानमन्त्रीमा समग्र रुपमा जंगबहादुर बन्ने आकांक्षा तीव्ररुपमा विकसित भएको छ। ’

शुक्रबार रिपोर्टर्स क्लब नेपालकोे साक्षात्कारमा नेता केसीले वर्तमान सरकारको ९ महिने कार्यकाल पुग्न अब चार दिन मात्रै बाँकी बताए । ‘समग्र रुपमा यो सरकार असफलतातर्फ उन्मुख छ । निर्वाचनको बेला जनतामा झुठको पुलिन्दा बाँड्यो’, केसीले भने, ‘तर, अहिले काम गर्न सकेको छैन । अहिले सरकार शक्ति केन्द्रित गर्ने प्रवृत्तिबाट अभिप्रेरित छ ।’

साक्षात्कारमा उनले प्रधानमन्त्री ओलीले २५ अर्बभन्दा माथिका परियोजनाहरु आफू मातहात केन्द्रित गरेकोमा पनि आपत्ति जनाए । 

‘यो ९ महिनामा सरकारले के चाहीँ राम्रो काम गर्यो त ? वृद्धभत्ताको कुरा उठाउँदा–उठाउँदै म त थाकिसकें । सत्तामा आउनुभन्दा पहिले ओली र प्रचण्डजीले भ्रष्टाचारीहरुलाई जेल हाल्छौं, कारबाही गर्छौं भनेर चर्को स्वरमा बोल्नुभयो’, केसीले भने, ‘तर, सत्तामा आएपछि अहिलेसम्म केही भएको छ त ? बरु बूढीगण्डकी परियोजना बिनाप्रतिष्पर्धा दिइयो ? वाइडबडीको विवाद त्यस्तै छ । साढे ३३ केजी सुन कहाँ छ ? यो प्रकरणमा पक्राउ परेकालाई किन गुपचुप राखिएको छ ? राख्नुपर्ने कारण के हो ?’

केसीले सुन तस्करी प्रकरणमा जुनसुकै पार्टीका मान्छे भएपनि जरैकिला उखल्नेगरि काम गर्न वर्तमान सरकारलाई केले रोक्यो भनेर प्रश्न गरे । त्यस्तै सरकारले सिण्डिकेटको अन्त्य गरेको भनेपनि अहिलेसम्म नतोडिएको उनको आरोप छ । उनले भने, ‘सरकारले जुनतारा झार्ने कुरा गर्छ । तर, काम भने शून्य छ ।’ 

पञ्चायतमा जस्तो अहिले नागरिकलाई सूचनाको हकबाट बञ्चित गराउने गरी मन्त्रिपरिषद बैठकका निर्णयहरु लुकाउने काम यो सरकारले गरेको भन्दै केसीले कडा आपत्ति जनाए । 

उनले निर्मला पन्तको बलात्कारपछि हत्या भएको आज ११२ दिन भइसक्दा पनि सरकारले दोषीलाई कारबाही गर्न नसकेको बताए । ‘निर्मलाका बुवाआमा अनशन बस्नुभएको छ । उहाँहरु विरामी पर्नुभएको छ । तर, सरकारले हत्यारा पत्ता लगाउन सकेन्’, उनले भने, ‘निलम्बित एसपीले आफूले त आईजीपीको निर्देशन मानेको हुँ भनेर बोलेको कुरा सनुेको छु, सरकारको लागि अपराधी किन ठूलो भएको हो ?’

मुलुकमा पछिल्लो समय बलात्कार, हत्या, भ्रष्टाचार, महँगी र मुल्यवृद्धिले चरम सीमा नाघेको अवस्थामा सरकार भने मुकदर्शक भएर बसेको उनको आरोप छ । ‘सरकार त आफ्ना आफन्तहरुलाई विभिन्न पदमा नियुक्ति गर्न लागिपरिरहेको छ’, उनले भने, ‘हुन त यो सरकार ५ वर्षको लागि हो । तर, यो पछिल्लो ९ महिनाको काम हेर्दा पूर्ण रुपमा असफलतातर्फ उन्मुख छ । अझै सरकारको अग्निपरीक्षा बाँकी नै छ ।’