चेन्नई : भारतको पूर्वी क्षेत्रमा आएको आँधीका कारण ३३ जनाको मृत्यु भएको छ । प्रकोप व्यवस्थापनसम्बन्धी निकायका उच्च अधिकारीहरूले शक्तिशाली आँधीका कारण धेरै क्षति भएको आइतवार जानकारी दिएका छन् ।
‘साइक्लोन गाजा’ नाम दिइएको उक्त आँधी प्रतिघण्टा १२० किलोमिटरको गतिमा आएको बताइएको छ । आँधी तमिलनाडु राज्यमा शुक्रबार आएको हो । आँधीले हजारौँ रूख भाँचिएका छन् भने ठूलो संख्यामा घरहरू भत्किएका छन् । आँधीले हजारौँ व्यक्ति घरबारविहीन भएका छन् । प्रभावित स्थानीय बासिन्दालाई शिविरहरूमा राखिएको छ । मृत्यु भएकामध्ये २० जना पुरुष र ११ जना महिला छन् । त्यसैगरी दुईजना बालबालिकाको पनि आँधीमा परेर मृत्यु भएको अधिकारीले बताएका छन् ।
‘घरबारविहीन भएकाहरूको संख्या १ लाख ७७ हजार ५ सय पुगेको छ । उनीहरूलाई ३५१ वटा शिविरमा राखिएको छ’, एक अधिकारीले पत्रकारहरूसँग भने । उनीहरूलाई पानी, दूध र खानेकुरा वितरण गरिरहेको राज्य सरकारले जनाएको छ । तमिलनाडु प्रदेशका मुख्यमन्त्री इडाप्पाडी पलानीस्वामीले पीडित प्रत्येक परिवारलाई १४ हजार डलरका दरले क्षतिपूर्ति दिने घोषणा गरेका छन् ।
अधिकांशको मृत्यु बाढीले बगाएर, घरहरूले च्यापेर र विद्युतीय गडबडीका कारण भएको छ । आँधीका कारण सयभन्दा बढी पशुचौपायाको मृत्यु भएको जनाइएको छ । आँधीका कारण १ लाख २७ हजारभन्दा बढी रूख लडेका छन् । नागपट्टिनम, तन्जावुर, तिरुवरुर, कुड्डालोर, पुदुक्कोट्टई र रामनाथपुरम जिल्ला अत्यधिक प्रभावित भएका छन् । राज्यभर ३० हजारभन्दा बढी विद्युत्का पोल भाँचिएका छन् । यसको मर्मत गर्न १० हजार कर्मचारी खटाइएको छ ।
प्रतिक्रिया दिनुहोस !
