माले : भारतीय प्रधानमन्त्री नरेन्द्र मोदीले भारत मालदिभ्सको साथमा रहेको बताएका छन् । मालदिभ्सका नयाँ राष्ट्रपति इब्राहिम मोहम्मद सोलिहको शपथ ग्रहणपछि मोदीले यस्तो जानकारी दिएका हुन् ।
शपथलगत्तै सोलिहले विगतको सरकारले सरकारी ढुकुटीमा लुट भएको बताउँदै चीनको प्रभावमाथि चिन्ता प्रकट गरेका थिए । शपथ ग्रहणमा महत्वपूर्ण विदेशी अतिथिका रूपमा मोदी आमन्त्रण गरिएका थिए ।
मोदीले मालदिभ्सलाई आर्थिक संकटबाट उकास्न सहयोग गर्ने प्रतिबद्धता व्यक्त गरे । हाल मालदिभ्स गम्भीर आर्थिक संकटमा फसेको छ । हाल मालदिभ्सले १ अर्ब ५० करोड अमेरिकी डलर ऋण लिएको छ । सोलिहले भौतिक पूर्वाधारका क्षेत्रमा चीनसँगबाट ल्याइएको ऋणमा लुटतन्त्र मचाइएको भन्दै पूर्वराष्ट्रपति अब्दुल्ला यमीनप्रति आक्रोश व्यक्त गरे । उनले पूर्ववर्ती सरकारले चीनसँग गरेको आर्थिक सम्झौताको पुनरावलोकन गर्न पनि माग गरेका छन् । पूर्ववर्ती सरकारका बेला निर्माणसम्बन्धी ठेक्काको सबै काम चीनलाई दिइएको उनले आश्चर्य व्यक्त गरे ।
मोदीले राष्ट्रपति सोलिहको शासनकालमा दुई देशबीच सुदृढ सम्बन्ध कायम हुने बताए । उनले शान्तिपूर्ण, लोकतान्त्रिक र समृद्ध देश बनाउन हरसम्भव सहयोग गर्ने विश्वास दिलाएका छन् ।
क्षेत्रीय शान्तिका लागि दुवै देशबीच पारस्पारिक हितका विषयमा जोड दिनुपर्नेमा दुवै नेता सहमत भएका थिए । उनीहरूले दुई देशबीच पुनः सुमधुर सम्बन्ध शुरुवात हुने पनि चर्चा गरे । मालदिभ्सले भारतीय लगानीलाई आकर्षण गर्न चाहेको छ । दुवै देशबीच भिसा प्रक्रिया सरल बनाउनुपर्ने माग गरिएको थियो । यसअघिको सरकारले भारतीयलाई कामदार भिसा दिन कडाइ गरेको थियो । यसैगरी चीनसँग करमुक्त व्यापार सम्झौता पनि भएको थियो ।
प्रतिक्रिया दिनुहोस !
