काठमाडौं : अबको १९ दिनपछि कीर्तिपुरस्थित त्रिभुवन विश्वविद्यालय (त्रिवि) क्रिकेट मैदानमा सुरु हुने एभरेस्ट प्रिमियर लिग (ईपीएल) टीट्वेन्टी क्रिकेट प्रतियोगिताको उद्घाटन खेलमा साविक विजेता विराटनगर वारियर्स र ललितपुर प्याट्रियट्सबीच भिडन्त हुने भएको छ । आयोजक जोहरा स्पोर्टस् म्यानेजमेन्टले सोमबार सार्वजनिक गरेको खेलतालिकाअनुसार पारस खड्का नेतृत्वको विराटनगर र ज्ञानेन्द्र मल्ल नेतृत्वको ललितपुरबीच पहिलो खेल हुनेछ ।
मंसिर २२ देखि पुस ७ सम्म सञ्चालन हुने प्रतियोगिताको पहिलो दिन एउटामात्र खेल हुनेछ भने त्यसपछिको ६ दिन दुई÷दुई खेल हुनेछन् । त्यसपछि फेरि फाइनलसम्म एक÷एक खेल हुनेछ । प्रतियोगितामा विराटनगर र ललितपुरसहित साविकका काठमाडौं किङ्स इलाभेन, भैरहवा ग्लाडिएटर्स, पोखरा राइनोज र चितवन टाइगर्सले प्रतिस्पर्धा गर्नेछन् । राउन्ड रोबिन लिग चरणको खेलमा शीर्ष चार स्थानमा रहने टोली प्ले अफ चरणमा प्रवेश गर्नेछन् । त्यसबाहेकका टोली उपाधि होडबाट बाहिरिने छन् ।
शीर्ष चारमध्ये पहिलो र दोस्रो हुने टोलीले पहिलो क्वालिफायर खेलमा प्रतिस्पर्धा गर्नेछन् । विजेता टोली फाइनलमा प्रवेश गर्नेछ । पराजित हुने टोलीले तेस्रो र चौथो स्थानमा रहने टोलीबीचको इलिमिनेटर खेलमा जित हात पारेर आएको टोलीसँग दोस्रो क्वालिफायर खेल्नेछ । पहिलो र दोस्रो क्वालिफायर खेलको विजेता टोलीले उपाधिका लागि प्रतिस्पर्धा गर्नेछन् । गत वर्ष फाइनल खेलमा शरद भेषावकरको कप्तानीमा रहेको भैरहवालाई एक रनले पराजित गर्दै विराटनगरले उपाधि जितेको थियो ।
पोखरामा अस्ट्रेलियन प्रशिक्षक
पोखरा राइनोजले अस्ट्रेलियन प्रशिक्षक नाथन डोडलाई आफ्नो मुख्य प्रशिक्षक नियुक्त गरेको छ । डोडले अस्ट्रेलियन क्रिकेट बोर्डबाट लेवल थ्री कोचिङ कोर्स गरेका छन् । डोडले विभिन्न अन्तर्राष्ट्रिय खेलाडीका लागि व्यक्तिगत तथा टोलीहरूका लागि परामर्शदाता प्रशिक्षकका रूपमा समेत काम गरेका छन् । डोडले आफ्नो प्रशिक्षणमा पोखरा राइनोजका खेलाडीको क्षमता सुधार गर्न आफूले मेहनत गर्ने बताए । ‘पोखरा राइनोजका खेलाडीको क्षमतामा थप सुधार ल्याउन सक्दो मेहनत गर्नेछु’, पोखरा राइनोजको स्वामित्व ग्रहण गरेको कम्पनी जगदम्बा स्पोर्टस्ले प्रशिक्षक डोडको भनाइ उद्धृत गर्दै विज्ञप्ति जारी गरेको छ ।
जगदम्बा स्पोर्टस्ले पनि प्रशिक्षक डोडको आगमनले टोलीको प्रदर्शनमा सुधार आउने विश्वास व्यक्त गरेको छ । ‘नेपाली क्रिकेटले राष्ट्रिय तथा अन्तर्राष्ट्रिय स्तरमा सशक्त प्रदर्शन गर्दै आइरहेको छ’, जगदम्बा स्पोर्टस्की प्रबन्ध निर्देशक दीपा अग्रवालले भनेकी छन्, ‘नेपाली खेलाडीलाई अझै पनि राम्रो प्रशिक्षण आवश्यक छ । डोडको आगमनले पोखरा राइनोजका खेलाडीले त्यो स्तरको प्रशिक्षण प्राप्त गर्ने विश्वास लिएकी छु ।’ शक्ति गौचनको कप्तानीमा रहेको पोखराले गत वर्ष इलिमिनेटर खेलेको थियो । उक्त खेलमा ललितपुरसँग २७ रनले पराजित हुँदै पोखरा उपाधि होडबाट बाहिरिएको थियो ।
प्रतिक्रिया दिनुहोस !
