दुबई : यमनको अन्तर्राष्ट्रिय मान्यता प्राप्त सरकारले वार्तामा बस्न तयार रहेको सोमबार घोषणा गरेको छ ।संयुक्त राष्ट्रसंघका प्रतिनिधि मार्टिन ग्रिफिथलाई हुथी विद्रोहीसँगको वार्तामा सहभागी हुने खबर सरकारी पक्षले पठाएको हो ।
मुलुकमा शान्ति स्थापनाका लागि आफूहरू वार्तामा बस्न तयार भएको अधिकारीको भनाइ छ । राष्ट्रसंघीय प्रतिनिधि ग्रिफिथले स्वीडेनमा वार्ता गर्ने पहल गर्दै आएका छन् । उनको पहलअनुसार अब सरकारी पक्षले वार्ता टोली स्वीडेन पठाउने भएको छ ।
‘वार्तामा सहभागी हुनेबारेमा हामीले राष्ट्रसंघीय प्रतिनिधिलाई जानकारी गराएका छौँ । अब सरकारकी प्रतिनिधि वार्ताका लागि स्वीडन जानुहुनेछ’, विदेश मन्त्रालयले भनेको छ । अहिलेको राजनीतिक संकट समाधान गरी मुलुकमा शान्ति स्थापनाका लागि वार्तामा सहभागी हुन लागेको विदेश मन्त्रालयलाई उद्धृत गर्दै साबा समाचार संस्थाले जनाएको छ । हुथी विद्रोही र यमन सरकारबीच शान्तिवार्ता गराउन आवश्यक तयारी गरी वातावरण बनाउन राष्ट्रसंघीय प्रतिनिधि ग्रिफिथ केही दिनमै यमनको राजधानी साना जानेछन् । उनले यमनको भ्रमण गर्न लागेको पूर्वसन्ध्यामा यसअघि हुथी विद्रोहीले आक्रमण रोक्ने घोषणा गरेको छ ।
यमनमा संघर्षरत हुथी विद्रोही समूहका एकजना उच्च नेताले यमनमा क्षेप्यास्त्र आक्रमण र ड्रोनबाट हुने आक्रमण स्थगित गर्ने घोषणा गरेका हुन् । सर्वोच्च क्रान्तिकारी समितिका प्रमुख मोहम्मद अलि अल-हुथीले ट्विट गरी सबै आधिकारिक यमनी राजनीतिक दललाई युद्धविराम गर्न आग्रह गरेका थिए । ‘हामी यमनका सबै आधिकारिक दलहरूलाई अतिक्रमणकारी देशविरुद्ध र उनीहरूका यमनी समर्थकमाथि रकेट आक्रमण र ड्रोनको प्रयोग रोक्न आग्रह गर्दछौं । यसबाट उनीहरूले हामीमाथि आक्रमणको कुनै आधार पाउनेछैनन् । शान्ति स्थापनाको तत्परता प्रस्तुत गर्न सबै मोर्चामा सैनिक आक्रमण रोक्न पनि आग्रह गर्छौं’, उनले लेखेका छन् ।
राष्ट्रसंघका विशेषदूत ग्रिफिथले शुक्रबार मात्र अर्को साता विद्रोहीको नियन्त्रणमा रहेको सानाको भ्रमण गर्ने जानकारीमा आएलगत्तै हुथी नेताको युद्धविराम गर्ने घोषणा सार्वजनिक भएको हो । सेप्टेम्बरमा पनि स्वीडेनमा शान्तिवार्ता गर्ने तय भए पनि अन्तिममा विद्रोही हुथी समूहले सुरक्षाको कारण देखाएका कारण वार्ता स्थगित भएको थियो ।
ग्रिफिथले भने, ‘हुथी विद्रोही र साउदी-समर्थित यमन सरकार दुवैले राजनीतिक समाधानप्रति प्रतिबद्धता दोहोर्याएकाले वार्ता हुन लागेको हो । दुवै पक्षले वार्तामा उपस्थित हुने बताएका छन् । तैपनि वार्ताको मिति भने तय गरिएको छैन ।’
अलि अल-हुथीले राष्ट्रसंघका विशेषदूतसँगको सम्पर्कपछि क्षेप्यास्त्र र ड्रोन आक्रमणका साथै अन्य आक्रमणका सम्पूर्ण क्रियाकलाप रोकिएको जानकारी दिए । यमनमा गृहयुद्धका कारण हजारौं मानिसको मृत्यु भइसकेको छ । सम्पूर्ण आर्थिक तथा मानवीय सहायताका सामग्री यमन भित्रिने लालसागरको तटीय शहर होडेडामा गत साता पनि भीषण लडाइँ भएको थियो ।
विद्रोहीले राजधानी साना र होडेडालाई सन् २०१४ मा नियन्त्रण गरेका थिए । अर्को वर्ष सरकारका पक्षबाट साउदी अरेबिया र यसका गठबन्धन मुलुकले सानामा हुथीविरुद्ध भीषण हमला गरेका थिए ।
विश्व स्वास्थ्य संगठनका अनुसार, त्यसयता मात्र १० हजारभन्दा बढी व्यक्तिको मृत्यु भइसकेको छ । अधिकारकर्मीले भने गृहयुद्धबाट मारिने व्यक्तिको संख्या ५० हजारभन्दा बढी भएको दावी गरेका छन् । राष्ट्रसंघले यमनको द्वन्द्वलाई अत्यन्त निकृष्ट रहेको जनाएको छ । एएफपी
प्रतिक्रिया दिनुहोस !
