महेन्द्रनगरबाट काकटभिट्टा जाँदै गरेको रात्रीबस दुर्घटना, २ को मृत्यु, ३९ घाइते

परासी : महेन्द्रनगरबाट काकटभिट्टातर्फ जाँदै गरेको रात्रीबस दुर्घटना हुँदा दुई जनाको मृत्यु भएको छ । दुर्घटनामा परी ३९ जना यात्रु घाइते भएका छन् ।  गएराति बुटवल–नारायणगढ सडक अन्तर्गत पश्चिम नवलपरासीको सुनवलस्थित सूर्यबस्तीमा महेन्द्रनगरबाट काकटभिट्टातर्फ जाँदै गरेको ना ५ ख १०१६ नम्बरको बस कल्भर्टमा ठोकिएर खोल्सामा खसी दुर्घटना भएको प्रहरीले जनाएको छ । 

दुर्घटनामा परी मृत्यु हुनेमा ३३ वर्षीय लोकेन्द्रबहादुर कार्की र अन्दाजी ४० वर्षका अर्का एक पुरुष रहेका छन् । प्रहरीका अनुसार कञ्चनपुर घर भएका लोकेन्द्रबहादुर काकी नेपाली सेनाका जवान हुन् । उनी रणसार्दुल गण गाइघाटमा कार्यरत थिए । 

मृतक अर्का पुरुषको सनाखत हुनस सकेको छैन । दुवै जनाको उपचारका क्रममा पृथ्वीचन्द्र अस्पताल परासीमा मृ्त्यु भएको बताइएको छ । चालकसहित अन्य घाइतेको लुम्बिनी सिटी अस्पताल र जेनस अस्पताल बुटवलमा उपचार भइरहेको छ । सबैको अवस्था सामान्य छ । 

विपरित दिसाबाट आइरहेको अर्को बससँग टाढैबाट फोक्स लाइट हाई डिमको संकेत माग्दा नदिएका कारण सडक नदेखिएकाले दुर्घटना भएको चालकलाई उद्धृतगर्दै जिल्ला ट्राफिक कार्यालयका निरीक्षक हेमबहादुर शाहीले बताए ।